Конституция – елдіктің еңселі айнасы
1995 жылдың 30 тамызы – еліміздің тарихында алтын әріппен жазылған күн. Бұл күні Қазақстан Республикасының жаңа Конституциясы бүкілхалықтық референдумда қабылданып, Тәуелсіз Қазақстанның құқықтық іргетасы қаланды. Содан бері 30 тамыз – ел бірлігін айшықтайтын, мемлекет мерейін өсіретін маңызды мереке.
Ата заң – әділеттің арқауы,
Халық үшін қастерлілік – салт-бағы.
Тәуелсіздік тұғырыңды биіктетіп,
Конституция – елдігімнің айғағы.
30 тамыз – мерейлі күн, мәртебем,
Ата Заңым – айбарың да, сән-дәрем.
Әрбір бабын қастерлейік, қазағым,
Ол – болашақ, бақытымның бағдары
Конституция – қағазға басылған заңдар жинағы ғана емес, ол – елдіктің айнасы, тәуелсіздіктің тірегі. Оның әр бабы – халқымыздың болашаққа деген сенімінің, татулық пен тұрақтылыққа деген ұмтылысының көрінісі. «Адам және оның өмірі, құқықтары мен бостандықтары – ең қымбат қазына» деп айшықталған тұжырым – соның дәлелі.
Бүгінгі Қазақстан – демократиялық, зайырлы, құқықтық әрі әлеуметтік мемлекет. Мұндай мәртебеге жетуімізге Конституция негіз болды. Халықтың атынан қабылданған бұл құжат елді ортақ мүддеге жұмылдырып, ынтымақ пен бірліктің алтын қазығына айналды.
Әр жыл сайын 30 тамызда еліміздің түкпір-түкпірінде түрлі мәдени-рухани шаралар ұйымдастырылып, халық Ата Заңымыздың маңызын тағы бір сезінеді. Ән шырқалып, жыр арналып, жас ұрпаққа Конституция құндылықтары дәріптеледі. Өйткені Ата Заңды ардақтау – Отанды қастерлеу.
Конституция күні – бұл мереке ғана емес, елдің еңсесін көтеретін, әр азаматтың жүрегіне мақтаныш сезімін ұялататын күн. Ол – Тәуелсіз Қазақстанның асқақ рухы мен жарқын болашағының кепілі.
Қасымхан Ж. А.
Қылмыстық істер жөніндегі мамандандырылған ауданаралық әскери соты әкімшісінің сот приставы
[xfvalue_img]
