Сот балаларымен кездесу тәртібін анықтады
Батыс Қазақстан облысының кәмелетке толмағандардың істері жөніндегі мамандандырылған ауданаралық сотында азамат Қ-ның азаматша Г-ға кәмелетке толмаған балаларымен кездесу тәртібін анықтау туралы талап арызы қаралды.
Істі сотта қарау барысында тараптар арасында ерлі-зайыпты қатынас тоқтатылғаны, ортақ некеден екі балалары бар екені, ажырасқаннан кейін анасының тәрбиесінде қалған анықталды. Талап қоюшы өзінің бөлек тұруына байланысты ата-аналық құқықтарын жүргізуді және баласымен қолайлы уақытты кездесе алмайды.
«Қазақстан Республикасындағы баланың құқықтары туралы» ҚР Заңының 26-бабына сәйкес, баланың өмірі мен денсаулығына қауіп төндіретін жағдайларды қоспағанда, бала өзінен бөлек тұратын ата-ана туралы ақпарат алуға, онымен кездесуге және сөйлесуге құқылы.
Алдын ала сот отырысы сатысында тараптар медиациялық келісімді бекіту арқылы азаматтық істі қысқартуға келісті.
Сот ұйғарымымен тараптар арасында жасалынған медиациялық келісім бекітілді, іс жүргізу тоқтатылды.
Салық кодексіне және Азаматтық іс жүргізу кодексінің талаптарына сәйкес талапкерге сотқа талап арыз берген кезде төленген мемлекеттік баж қайтарылды.
Сот ұйғарымы заңды күшіне енген жоқ.
[xfvalue_img]
