«Ата Заң - тәуелсіздік тірегі»
Ата Заң – мемлекетіміздің басты құжаты, тәуелсіздігіміздің тұғыры. Ол – Қазақстан Республикасының құқықтық, саяси және әлеуметтік жүйесінің негізі. Еліміздің даму бағыты мен азаматтардың құқықтары мен бостандықтарын нақты айқындап беретін бұл құжат – әрбір қазақстандық үшін қадірлі де қасиетті.
1995 жылы 30 тамызда бүкілхалықтық референдум арқылы қабылданған Қазақстан Республикасының Конституциясы – тарихи маңызды кезеңдердің бірі. Бұл күн – еліміздің егемен ел ретінде өз даму жолын айқындап, демократиялық, құқықтық, зайырлы және әлеуметтік мемлекет құрудағы нақты қадамы болды.
Ата Заң – азамат пен мемлекет арасындағы сенім көпірі. Онда адам және оның өмірі, құқықтары мен бостандықтары – ең қымбат қазына деп бекітілген. Конституция әр азаматтың теңдігін, сөз бостандығын, еңбек ету, білім алу, және басқа да негізгі құқықтарын кепілдік етеді.
Сонымен қатар, Ата Заң – еліміздің тұтастығы мен тұрақтылығының кепілі. Онда мемлекеттің құрылымы, басқару жүйесі, билік тармақтарының өзара әрекеттесу қағидалары нақты көрсетілген. Бұл – тәуелсіздік жылдарында еліміздің бейбіт өмір сүріп, дәйекті даму жолына түсуіне мүмкіндік берді.
Тәуелсіздік пен Ата Заң – егіз ұғым. Егемен елдің өз Конституциясы болуы – ұлттық болмыс пен мемлекеттіліктің нышаны. Ата Заң болмаса, құқықтық мемлекет те болмас еді. Сондықтан әрбір азамат Конституцияны құрметтеп, оны ұстануы – ел болашағына қосқан үлесі деп санауы тиіс.
Қорытындылай келе, Ата Заң – біздің тәуелсіздігіміздің тірегі ғана емес, ұлт ретінде ұйысуымыздың негізі. Оны көздің қарашығындай сақтау – әрбір қазақстандықтың парызы. Себебі, Конституция – еліміздің ертеңіне апарар сенімді жол.
Қылмыстық істер жөніндегі мамандандырылған ауданаралық
әскери сот әкімшісінің басшысы Н.Жунисова
[xfvalue_img]
65 пікір