СОТ ОРГАНДАРЫНЫҢ БІРЫҢҒАЙ ПОРТАЛЫ

Қазақстан Республикасында сот жүйесін цифрландыру және азаматтарға көрсетілетін қызметтердің сапасын арттыру бағытындағы жұмыстар жүйелі түрде жалғасуда. Осы мақсатта Қазақстан Республикасы Сот әкімшілігі «Сот органдарының бірыңғай порталы» жаңартылған мобильді қосымшасын іске қосты. Бұл қосымша азаматтарға сот қызметтерін кез келген уақытта және кез келген жерде пайдалану мүмкіндігін ұсынып, сот жүйесінің ашықтығы мен қолжетімділігін қамтамасыз етуге бағытталған.

Қазіргі таңда ақпараттық технологиялар қоғам өмірінің барлық саласына еніп, мемлекеттік қызметтерді алудың жаңа мүмкіндіктерін қалыптастыруда. Сот жүйесі де бұл үдерістен шет қалмай, халыққа ыңғайлы әрі тиімді сервистерді енгізуде. Жаңартылған мобильді қосымша осы бағыттағы маңызды жобалардың бірі болып табылады.

«Сот органдарының бірыңғай порталы» арқылы пайдаланушылар өздерінің сот істерінің қаралу барысын онлайн режимде бақылауға мүмкіндік алады. Бұл сот процесіне қатысушылардың уақытын үнемдеп қана қоймай, сот отырыстары туралы ақпаратты жедел алуға жағдай жасайды. Сонымен қатар қосымшада сот отырыстарының кестесін көру, олардың өтетін уақыты мен орнын нақтылау функциялары қарастырылған.

Қосымшаның маңызды артықшылықтарының бірі - құжаттармен жұмыс істеу мүмкіндігі. Пайдаланушылар қажетті құжаттардың түпнұсқалығын тексеріп, олардың мәртебесі туралы мәлімет ала алады. Бұл өз кезегінде құжат айналымының ашықтығын қамтамасыз етіп, азаматтардың сот жүйесіне деген сенімін арттыруға ықпал етеді.

Сондай-ақ мобильді қосымша арқылы хабарламалар алып отыру мүмкіндігі енгізілген. Бұл қызмет пайдаланушыларға сот істеріне қатысты өзгерістер мен маңызды оқиғалар туралы жедел ақпарат беруге арналған. Нәтижесінде азаматтар сот процестеріндегі жаңартулардан дер кезінде хабардар болып отырады.

Қосымшада сот жүйесіне қатысты жаңалықтармен танысу және жеке профильді басқару қызметтері де қолжетімді. Бір платформада бірнеше қызметтің біріктірілуі пайдаланушыларға қажетті ақпаратты жылдам тауып, сот қызметтерін тиімді пайдалануға мүмкіндік береді.

Жаңартылған мобильді қосымша iOS және Android операциялық жүйелерінде қолжетімді. Қосымшаны жүктеу үшін арнайы QR-кодтар соттардың фронт-офистерінде, ақпараттық бұрыштарында және ресми ақпараттық ресурстарында орналастырылған.

Мемлекет басшысы айқындаған цифрлық трансформация саясаты аясында жүзеге асырылып жатқан мұндай жобалар мемлекеттік органдар жұмысының тиімділігін арттыруға және халыққа қызмет көрсетудің сапасын жақсартуға бағытталған. «Сот органдарының бірыңғай порталы» мобильді қосымшасы сот жүйесінің ашықтығын қамтамасыз етіп қана қоймай, азаматтардың сот төрелігіне қолжетімділігін кеңейтетін заманауи құралға айналуда.

Цифрландыру дәуірінде сот қызметтерін электрондық форматта алу уақыт пен ресурсты үнемдеуге мүмкіндік береді. Сондықтан жаңа мобильді қосымшаны пайдалану азаматтар үшін де, сот жүйесі үшін де тиімді шешім болып табылады. Алдағы уақытта мұндай цифрлық сервистердің одан әрі жетілдірілуі сот төрелігінің сапасын арттыруға және халықтың құқықтарын қорғаудың заманауи тетіктерін дамытуға өз үлесін қоса беретіні сөзсіз. 

Ақтөбе гарнизоны әскери сотының судьясы Валиева С.А.