Отбасы құндылығы басты қазына
Отбасы құндылығы – мемлекеттің ұстанып отырған басты саясаты. Шаңырақтың үйлесімді дамуы мемлекеттің іргетасының берік болуына қызмет етеді. Отбасы – бұл сыйластық, жарастық орнаған орта, шағын мемлекет іспеттес. Онда ертеңгі елдің тұтқасын ұстайтын азамат тәрбиеленеді. Сондықтан одан берілетін тәрбие мен әдет-ғұрып, дәстүрдің сақталуы ерекше мәнге ие. Алайда, бүгінде түрлі себептермен шаңырақтар шайқалып, бала тағдыры мен тәрбиесіне өз деңгейінде көңіл бөлінбей жатқындығы жасырын емес. Бұрынғы ата-бабамыз ерекше қастерлеген отбасылық құндылық мәселесі неге төмендеп кетті ?
Әрқайсысының өз дәлелі бар. Бірі тұрмыстық жағдайды алға тартса, енді біреулерінің мінезі сәйкес келмейді-мыс. Не десек те ажырасудың аты – ажырасу. Одан қоғамға да адамаға да келіп жатырған пайда шамалы, ал зардабы көп. Шаңырақты шайқалтуға әкеп соғатын жағдайлардың бірі материалдық жетіспеушілік. Осындай себеппен отбасында шырғалаң туғанда үлкендердің жастарды қолдауы – зор көмек. Ажырасу баланың психикасына салмақ салады. Әр бала мінезіне сай, ата-анысының екі жаққа бөлінуін түрліше қабылдауы мүмкін. Кейбірі қасақана теріс жолға түсіп, қылмыс жасауға дайын тұрады. Бұл баланың «кек алудағы» бір тәсілі десек те болар. Кейбір балалардың күнделікті кикілжің мен ұрыс – керістен шаршағандықтан өмірге қызығушылығы азаяды.
Тәрбие тал бесіктен басталады. Ұрпақтар сабақтастығын қамтамасыз етуде отбасы үлкен рөл атқарады. Ата-ананың мейірімін көріп өскен бала ертеңгі мемлекетіміздің абыройы. Шындығында, ажырасу - өте қауіпті дерт. Ел боламыз десек, ең бірінші шағын мемлекетімізді түзеуіміз қажет. Дәм-тұзы жараспаған ерлі-зайыптылар екі бөлек кетсе де, бала тәрбиесі мен оны бағып-қағу ортақ болып қалады. Өкінішке орай, бұл жауапкершілікті бірігіп көтеретін азаматтардың қатары да сиреп бара жатыр.
Туған баласының несібесін аузынан жырып, қара басының қамын күйттеген мұндай адамдар ар алдындағы жауаптылықты сезінеді ме екен ? «Жаста берген тәрбие – жас шыбықты игендей», деп Ы.Алтынсарин айтпақшы, ел басшысынан бастап даладағы еңбекшіге дейін ата-анадан тәрбие алып шығатыны белгілі. Ал, тәрбиеде кеткен қателікті түзеу оңай жұмыс емес. Сондықтан да ажырасуға бел буған кезде, араларындағы балаларының құқықтарын да бір сәтке ескерген жөн.
Ақтөбе гарнизоны әскери сотының әкімшісінің басшысы А.У.Кожина
[xfvalue_img]
