Әдеп кодексі – мемлекеттік қызметшілердің ең басты міндеті

Мемлекеттік қызметші – ол билік пен халық арасындағы өзіндік байланыстырушы буын болып табылады, сондықтан да, көп нәрсе оның кәсіби біліктілігіне, жедел түрде ой қорытып, қандай да бір мәселелерді шешу жауапкершілігін өз мойнына ала білу дағдысын игергендігіне байланысты.

Қазақстан Республикасы Президентінің 2015 жылғы 29 желтоқсандағы №153 Жарлығымен Қазақстан Республикасы мемлекеттік қызметшілерінің әдеп кодексі қабылданып, 2022 жылғы 22 ақпандағы №814 Жарлықпен жаңа редакцияда бекітілді.

Мемлекеттік қызметшілерге қойылатын талаптар:

1) қарапайым болу, жалпыға бірдей қабылданған моральдық-әдептік нормаларды сақтау, шындыққа сәйкес келмейтін мәліметтерді таратпау;

2) мемлекет мүдделеріне және азаматтардың құқықтарына нұқсан келтіретін әрекеттерге қарсы тұру;

3) заңда белгіленген шектеулерді сақтау, мүдделер қақтығысын болдырмау;

4) азаматтармен қарым-қатынаста әдептілік таныту, дөрекілік, қадір-қасиетін кемсіту, әдепсіздік және бейәдеп мінез-құлық фактілеріне жол бермеу, өздерінің әрекеттерімен және мінез-құлқымен олардың тарапынан сынға себепкер болмау;

5) іскерлік әдеп пен ресми мінез-құлық қағидаларын сақтау, азаматтардың көз алдында өздері өкілі болып табылатын мемлекеттік органдардың абыройы мен беделіне айқын нұқсан келтіретін әрекеттер жасауға жол бермеу;

6) лауазымдық міндеттерді атқаруға байланысты кез келген сипатта құқыққа сыйымсыз уәделерді бермеу және құқыққа сыйымсыз міндеттемелерді алмау;

7) жеке сипаттағы мәселелерді шешу кезінде мемлекеттік органдардың, ұйымдардың, мемлекеттік қызметшілер мен өзге де адамдардың қызметіне ықпал ету үшін қызметтік жағдайын, сондай-ақ онымен байланысты мүмкіндіктерді қоғамдық және діни бірлестіктердің, басқа да коммерциялық емес ұйымдардың мүдделерінде, оның ішінде оларға өзінің көзқарасын насихаттау үшін пайдаланбау;

8) мемлекеттік меншіктің сақталуын қамтамасыз ету, мемлекеттік мүлікті тек нысаналы мақсаты бойынша, лауазымдық міндеттерін және рұқсат етілген қызмет түрлерін орындау үшін пайдалану;

9) қызметтік міндеттерді адал орындауға кедергі келтіретін құқыққа сыйымсыз қаржылық және мүліктік мүдделерді қудаламау;

10) қызметтік міндеттерін орындауға байланысты жағдайларды қоспағанда, ойын мекемесіне барудан тартыну.

Мемлекеттік қызметші әдеп кодексінде көрсетілген талаптарға сай болып, саналы өзгеріске бет бұрса, тұлғалық болмысының да уақыт талабына сай жаңа сипатта жаңғырары сөзсіз.

Мемлекеттік қызметші болу – зор құрмет, сондықтан да кәсібилілікпен бірге жоғарғы адамгершілік қасиеттерге ие болған абзал. «Адамның басшысы-ақыл, жетекшісі-талап, қорғаны-сабыр, жолдасы-кәсіп, қорғайтын қорғаушысы-мінез, бәрін тәртіпке реттейтін-әдептілік»,- деп дана халқымыз бекер айтпаған. Қазіргі таңда осы айтылған рухани құндылықтар қоғамның кез-келген саласында да өзекті болып табылады. Мемлекеттік қызметшілер әдеп кодексінің талаптарын сақтауды әрдайым назарда ұстаулары тиіс.

Астана қаласының мамандандырылған

ауданаралық тергеу сотының

жетекші маманы                                                                

Аружан Жайғалиева