Тіл мәртебесі - Ел мәртебесі
Тіл-мемлекеттің табан тірейтін тұғырлы қазығы. Тіл-ұлттың тірегі, ұлттың аса ұлы игілігі. Қандай да бір халықтың болмысы, өркениеттілігі, саналылығы, сауаттылығы тіл мәдениетімен, сол тілді қолданыс ауқымдылығымен өлшенеді. Еліміз егемендік алып, ана тіліміз мемлекеттік мәртебеге ие болып, қолданыс өрісі кеңейді. Елбасы Нұрсұлтан Әбішұлы Назарбаев «Қазақтың болашағы - қазақтың тілінде» деп алдымызға айқын жол ашып берді.
Мемлекеттік тіл мемлекеттік маңызды мәселе болғандықтан ол азаматтық патриотизм, мәдени тұтастық сияқты ұғымдармен тығыз байланысты. Тіл елдің мәдениетін қалыптастыратын ұйытқы, ұлттық бірліктің негізі.
Тіл меңгеруде, өз тілінде еркін сөйлеуде ата-ананың рөлі ерекше. Ана тілі- ананың ақ сүтімен, әр қазақ баласының бойына сіңген тіл Ана тіліміз арқылы ғана біз халқымызды, оның тарихын, тұрмыс-тіршілігін, әдеп–ғұрпын, салт-дәстүрін терең тануға жол ашады. Басқа елдерге ұлттық мемлекет ретінде танылғымыз келсе, ең алдымен қасиетті ана тілімізді сақтауымыз керек. Тілі жоғалған ұлттың өзі де жоғалатыны белгілі. «Ұлттың сақталуына да, жойылуына да себеп болатын тіл» деген Ахмет Байтұрсынұлы. Әркімнің тілге деген құрметін өз анасына, өз ұлтына, өз Отанына деген құрмет деп білуге болады.
Республикамызда мемлекеттік тілдің қолданылу аясын кеңіту-бүгінгі таңдағы өзекті мәселе. Қазақстанның жастары мынаны білуі тиіс: мемлекеттік тілді білмейінше мемлекеттік органдарда, құқық қорғау органдарында, сот саласында жұмыс жасау мүмкін болмайды.Мемлекеттік тілде қойылған сұрақтарға сол тілде жауап беруге тура келеді.Сондықтан мемлекеттік тілдің маңыздылығын насихаттаудың маңызы зор.
Тіл-аса қадірлеп ұстайтын байлығымыз. Демек бүгінгі ұрпақ- біз ана тілімізді –ата-бабаларымыздың келешек ұрпақ үшін сақтап, оны бағалауымыз қажет.
Мемлекеттік тіліміздің мәртебесі үстем болып, ол мемлекетіміздің ең маңызды тірегіне айнала берсін.
Ақтөбе облысының мамандандырылған ауданаралық әкімшілік сотының бас маман-сот отырысының хатшысы Баубек Арықбаев
[xfvalue_img]
