Мемлекеттік қызметшінің әдебі

Мемлекеттік қызметші мемлекеттік биліктің айнасы секілді. Оның ар-ожданы биік, әділетті, талантты ұйымдастырушылық қабілеті бар екендінін қоғам бағалайды.

Мемлекеттік қызметшілер қызметтен тыс уақытта қоғамға жат мінез ‑құлық, оның ішінде қоғамдық орындарда адамның қадір- қасиетін және қоғамдағы адамгершілікке нұқсан келтіретін масаң күйде болу жағдайларына жол бермеуге, шындыққа сәйкес келмейтін мәліметтерді таратпауға, қарапайым болуға, тиісті көрсетілетін қызметтерді алу кезінде өзінің лауазымдық жағдайын баса көрсетпеуге және пайдаланбауға, адал, әділ, қарапайым болуға, жалпы қабылданған моральдық- әдептілік нормаларын сақтауға, азаматтармен және әріптестерімен және әріптестерімен қарым ‑ қатынаста сыпайылық пен әдептілік танытуға, өз тарапынан қоғамдағы адамгершілікке, тәртіпке және қауіпсіздікке қол сұғушылыққа әкелетін заңзама талаптарын бұзуға және басқа азаматтарды құқыққа қарсы, қоғамға жат әрекеттерді жасауға тартуға жол бермеуге тиіс.

Қоғамдық пікірді есепке ала отырып, өз – өзіне жоғары талап қоя білу мемлекеттік қызметшінің өзін – өзі ұдайы жетілдіру ғана емес, өзгелерден сондай жетілуді талап ету болып табылады. Талап қоя, сұрай білу де – мемлекеттік қызметшінің кәсіптік имиджінің моральдық кодексінін талаптарының бірі. Талап ету – сенім білдірумен, сыйлаумен сабақтасып жатуы қажет. Мемлекеттік қызметшіге қажет бір қасиет – тыңдай білу. Тыңдай білу сөйлеушінің сөзін бөлмей мақұлдау ғана емес, оның ойына, сезіміне ортақтасу. Сөйлеп отырған адамға тыңдаушының бет құбылысы: бейтарап отыр ма, жалығып кетті ме, әлде қызығып, көмектесуге дайындалуда ма бәрі әсер етеді. Қызметшінің жеке бас проблемасы әңгімелесушінікіне қарағанда анағұрлым күрделі, қиын мәселе болса да, ол тындаушы ретінде өз проблемасын естен шығара тұруы тиіс. Моральдық сапа қасиеттерінің ішіндегі ең шынайысы – Мемлекеттік қызметшінің өз беделі.

Мемлекеттік қызметші жақсы сөйлей білуі тиіс. Ол үшін әдеби кітаптар оқып, өлеңдер мен көркемсөздер жаттау арқылы жақсы сөз тіркестерін үнемі жаңғыртып отыруы тиіс. Тап-таза, өзіне сенімді, сыпайы, көзге ұрып тұратын артық жылтырақсыз киінген, әдемі сөйлей алатын, тыңдай білетін, жауапкершілігі мол қызметкер сенімге тез ие болады. 

             Халық сенімі мемлекеттік қызметшінің мемлекеттік қызметті қаншалықты сапалы көрсеткендігіне қарап нығаяды. Сондықтан, әрбір мемлекеттік қызметші өз орнында халықтың мүддесіне қызмет етіп, этика шеңберінен аспауы тиіс. 

Қайроллиева Ақнұр Талғатқызы

Батыс Қазақстан облысының мамандандырылған ауданаралық экономикалық сотының бас маманы