Елордада үшінші мәрте «Тіл-достықтың алтын көпірі» байқауы өтті

Осындай атаумен елордалық Достық үйінде Жастар жылы және «Рухани жаңғыру» бағдарламасы аясында Нұр-Сұлтан қаласы Қазақстан халқы Ассамблеясының ұйымдастыруымен байқау өтті.

Байқаудың басты мақсаты – мемлекеттік тілді үйренуді, сондай-ақ, этномәдени бірлестіктердің өкілдері мен жастарды қазақ мәдениеті мен шығармашылығына ынталандыру, қазақстандық патриотизмді тәрбиелеу және мемлекеттік тілдің мәртебесі мен маңызын насихаттау болып табылды.

Кешке қоғам қайраткерлері, елордалық этномәдени бірлестіктердің және ҚХА жастарының өкілдері қатысты.

 «Жаңа бір тілді меңгеру, бөлмеңізге жаңа терезе орнатқанмен тең. Мемлекеттік тілді меңгеру баршамыздың міндетіміз. Бұл байқау елордалық ҚХА жастарының қаншалықты белсенді әрі қазақ тіліне деген құрметінің жоғары екендігін көрсетеді, - деп атап өтті Нұр-Сұлтан қаласы Қазақстан халқы Ассамблеясы кеңесінің мүшесі Амангелді Сыздықов.

Байқауға әділ бағасын беретін қазылар қатарында педагог, оқытушы. Айтолқын Күзембекова, тілдерді дамыту басқармасының ұйымдастыру және талдау бөлімінің басшысы Нұрзила Қасқатаева және Нұр-сұлтан қаласы әкімдігі жанындағы «Қоғамдық келісім» КММ қоғамдық бұқаралық іс-шараларды ұйымдастыру бөлімінің  бас маманы Қадырбай Нұрпейісұлы болды.

 «Тіл-достықтың алтын көпірі» байқауында  елордалық этномәдени орталықтың жастары қатысты. Олардың қатарында Нұр-Сұлтан қаласы ұйғыр этномәдени орталығы, «Жайхун» қарақалпақ этномәдени бірлестігі, «Радима» беларусь мәдени орталығы, «Оберег» украин қоғамы, «Polacy» қоғамдық бірлестігі, «Юнчи» дүнген этномәдени орталығы және Нұр-Сұлтан қаласы өзбек этномәдени орталығы болды.

Барлық қатысушылар 3 кезең бойынша бақтарын сынады. Бірінші кезеңде этномәдени бірлестіктердің қатысушылары «Менің Отаным – Қазақстан» тақырыбында ауызша таныстырылым жасады. Бірінен бірі асқан видео көріністер, безендірулер қазылар алқасын тамсандырды. Таланттын нағыз шындалатын уақыты екінші кезеңде байқалды. Байқау қатысушылары топтық жұмыспен, «Тіл – достықтың алтын көпірі» атты театрландырылған қойылымды көрермендер назарына ұсынды. Шешендік қабілеттерін танытудан, сондай-ақ, сахнада өзін-өзі ұстау шеберліктері бойынша сынға түсті. Нұр-Сұлтан қаласы ұйғыр этномәдени орталығынан Аружан Арзидун, «Жайхун» қарақалпақ этномәдени бірлестігінен Айсанем Аймбетова, «Радима» беларусь мәдени орталығынан Светлана Тарасова, «Оберег» украин қоғамынан Юлия Лагуткина, «Polacy» қоғамдық бірлестігінен Мария Жуликова, «Юнчи» дүнген этномәдени орталығынан Залина Ибрагимова және Нұр-Сұлтан қаласы өзбек этномәдени орталығынан Дильдора Абдулхаева шешуші кезеңде қазақ әдебиеті классиктерінің және қазіргі заман әдебиеті ақындары мен жазушыларының шығармаларын мәнерлеп оқыды.

Тартысты бәйгеде қазылар алқасының шешімен мемлекеттік тілді үйренуді, сондай-ақ, этномәдени бірлестіктердің өкілдері мен жастарды қазақ мәдениеті мен шығармашылығына ынталандыру мақсатында елордалық этномәдени орталықтардың жастары арасында өткен «Тіл-достықтың алтын көпірі» байқауында 1 орынды Нұр-Сұлтан қаласы ұйғыр этномәдени орталығы, 2 орынды «Polacy» қоғамдық бірлестігі, 3 орынды «Юнчи» дүнген этномәдени орталығы иеленді. Байқау жеңімпаздары мен барлық қатысушыларға ұйымдастырушылар атынан бағалы сыйлықтар мен алғыс хаттар табысталды.

Нұр-Сұлтан қаласы әкімдігі жанындағы

«Қоғамдық келісім» КММ баспасөз қызметі

Тел. 48 19 46 / + 7 776 266 47 37 Жансая Играшина

e-mail: kguast@mail.ru