СЖРА мен Халықаралық валюта қоры Қазақстанның реформалар күн тәртібі мен даму басымдықтарын талқылады
Қазақстан Республикасы Президентінің Кеңесшісі - Стратегиялық жоспарлау және реформалар агенттігінің Төрағасы Әсет Ерғалиев Халықаралық валюта қорының Қазақстан бойынша миссиясының жетекшісі Амина Лареш бастаған ХВҚ өкілдерімен кездесу өткізді.
Кездесу барысында өнімділікті арттыруға, жеке секторды дамытуға, инвестициялар тартуға, цифрлық трансформацияны ілгерілетуге және жасанды интеллект технологияларын енгізуге негізделген Қазақстанның экономикалық өсімінің жаңа моделін қалыптастыру мәселелері талқыланды.
Тараптар сондай-ақ конституциялық жаңғыртуды, жаңа Салық кодексін енгізуді, экономиканы ырықтандыру және бәсекелестік ортаны дамыту жөніндегі шараларды қоса алғанда, институционалдық және экономикалық реформалардың іске асырылу барысын қарастырды.
«Қазақстан бәсекеге қабілеттілігі жоғары, әртараптандырылған әрі орнықты экономиканы қалыптастыруға бағытталған институционалдық және экономикалық реформаларды дәйекті түрде жүзеге асырып келеді. Конституциялық және салық реформалары, сондай-ақ экономиканы ырықтандыру жөніндегі шаралар мемлекеттік басқару сапасын арттыруға, жеке секторды дамытуға және ұзақ мерзімді экономикалық өсімді қамтамасыз етуге негіз қалайды», – деп атап өтті Әсет Ерғалиев.
Кездесу барысында макроэкономикалық тұрақтылық, инфляциялық үдерістер және экономикалық саясат шараларын үйлестіру мәселелеріне ерекше назар аударылды. Сондай-ақ жүргізіліп жатқан өзгерістердің тиімділігін арттыру, инвестициялық ахуалды жақсарту және жеке инвестициялар үшін мүмкіндіктерді кеңейту тәсілдері қарастырылды.
ХВҚ өкілдері Қазақстан экономикасының тұрақты өсу қарқынын және бірқатар макроэкономикалық көрсеткіштер бойынша оң динамиканы атап өтті. Талқылау барысында құрылымдық өзгерістер, бәсекелі нарықтарды дамыту, экономиканың орнықтылығын күшейту және өсудің жаңа көздерін қалыптастыру мәселелері бойынша пікір алмасу өтті.
Кездесу ағымдағы экономикалық үрдістерге бойынша ұстанымдарды салыстыруға және экономиканың бәсекеге қабілеттілігін арттыруға әрі елдің орнықты ұзақ мерзімді дамуын қамтамасыз етуге бағытталған реформаларды іске асыру жөніндегі алдағы қадамдарды талқылауға мүмкіндік берді.
[xfvalue_img]
1 пікір