ҚАРАҒАНДЫДА ЖАСӨСПІРІМДЕРГЕ АРНАЛҒАН АЛҒАШҚЫ КРЕАТИВТІ ИНДУСТРИЯЛАР ИНКУБАТОРЫНЫҢ ҚОРЫТЫНДЫСЫ ШЫҒАРЫЛДЫ

Қарағанды қаласында Қазақстан өңірлерінен келген жасөспірімдер мен педагогтерге арналған Creative Start бағдарламасының финалы өтті. Бұл – еліміздегі жасөспірімдерге арналған алғашқы креативті индустриялар инкубаторы. Қатысушылардың басым бөлігі үшін бұл креативті индустриялар саласындағы тәлімгерлермен алғашқы жұмыс тәжірибесі, өз идеясын алғаш рет көпшілік алдында таныстыру және алғашқы аяқталған жобасы болды. Олар компьютерлік ойындар, бейнероликтер, музыкалық тректер мен комикстер әзірледі.

Қазақстанның Креативті индустриялар альянсының президенті Давид Туғановтың айтуынша, бағдарлама талантты жасөспірімдердің еліміздің барлық өңірінде бар екенін дәлелдеді. Ал заманауи білім мен кәсіби қауымдастыққа қолжетімділік олардың шығармашылық әлеуетін тез әрі жарқын ашуға мүмкіндік береді.

Бүгінде креативті индустриялар әлемдік экономиканың ең қарқынды дамып келе жатқан салаларының бірі саналады. Компьютерлік ойындарды әзірлеу, цифрлық контент жасау, анимация, музыка, дизайн және иллюстрация бұрынғыдай жай ғана хобби емес, толыққанды кәсіпке айналды. Creative Start бағдарламасы көптеген қатысушылар үшін осы бағыттармен жақынырақ танысуға, тәжірибелі мамандардан кері байланыс алуға және өз өнімдерін жасап көруге алғашқы мүмкіндік болды.

Сегіз апта бойы жасөспірімдер креативті кәсіпкерліктің, дизайн-ойлаудың, кәсіптік бағдарлаудың, эмоциялық интеллекттің және жобалық жұмыстың негіздерін меңгерді. Бағдарламаның жеке білім беру бағыттары ойын әзірлеуге, мобильді видеоға, музыкаға, комикстерге және цифрлық иллюстрацияға арналды. Қатысушылар креативті индустриялардың тәжірибелі мамандарымен жұмыс істеп, сарапшылардың онлайн-кездесулеріне қатысып, менторлардың жеке қолдауына ие болды.

Білім беру жобасы AYALA қайырымдылық қоры мен «TransforNation» қоғамдық қорының бастамасымен, Cummins Kazakhstan компаниясының қолдауымен жүзеге асырылды. Бағдарламаға жасөспірімдер мен педагогтердің қатысуы толықтай тегін болды.

Алғашқы креативті индустриялар инкубаторы Қазақстанның 12 өңірінен 129 қатысушыны қамтыды. Олардың қатарында 106 жасөспірім және 23 педагог болды. Бағдарламаға қала мектептерінің оқушыларымен қатар ауылдық елді мекендерден келген балалар, сондай-ақ мемлекеттік әлеуметтік мекемелердің тәрбиеленушілері мен қосымша қолдауды қажет ететін отбасылардан шыққан жасөспірімдер қатысты.

Бағдарлама қорытындысы бойынша 6 маусым күні Қарағанды қаласында өткен Demo Day финалына 18 команда жолдама алды. Олар қазылар алқасына өздері әзірлеген компьютерлік ойындарды, бейнежобаларды, музыкалық шығармаларды, графикалық жұмыстар мен комикстерді ұсынды.

Финалистердің ең көп саны GameDev бағыты бойынша бақ сынады – жеңіс үшін алты команда күресті. Comics & Publishing санатында бес команда өз жобаларын ұсынды. Mobile Video бағыты бойынша төрт команда, ал Music & Beatmaking санатында үш команда финалға шықты.

Финалистер қазылар алқасының жоғары бағасына ғана емес, ақшалай сыйлықтарға да таласты. Creative Start бағдарламасының жалпы жүлде қоры шамамен 3 миллион теңгені құрады.

Төрт бағыттың әрқайсысында жеңімпаздар мен жүлдегерлер өз жобаларын одан әрі дамытуға арналған гранттарға ие болды. Бірінші орын алған командаларға 300 мың теңгеден, екінші орын иегерлеріне 200 мың теңгеден, үшінші орын алғандарға 120 мың теңгеден табысталды. Сонымен қатар, қазылар алқасы арнайы номинациялар мен Академияның арнайы сыйлығын тағайындады.

Creative Start 2026 жеңімпаздары

GameDev

1-орын — Without Testing Function (Петропавл)
2-орын — Imperium (Алматы)
3-орын — MetaDream (Шымкент)
⭐ Арнайы грант — 727 (Петропавл)
⭐ Арнайы грант — Grey Sparrows (Қарағанды)

Comics

1-орын — Mainstream (Алматы)
2-орын — Creeper (Қарағанды)
3-орын — Forest Frame Team (Теміртау, Қарағанды облысы)
⭐ Арнайы грант — 2Wings (Қарағанды облысы)
⭐ Арнайы грант — SF25 (Қарағанды)

Music

1-орын — YungCreatorCrew (Атырау / Петропавл)
2-орын — Fuego (Қарағанды облысы / Шымкент)
3-орын — «Орешки» (Қарағанды облысы)

Video

1-орын — «Общий мир» (Қарағанды облысы)
2-орын — MVP SQUAD (Қарағанды облысы)
3-орын — New Wave Crew (Қарағанды облысы)

«Cummins компаниясы үшін жасөспірімдер мен жастарды қолдау әлеуметтік инвестициялардың маңызды бағыттарының бірі болып табылады. Бірнеше жылдан бері біз AYALA қорымен бірлесіп Қарағанды облысында жасөспірімдердің практикалық дағдыларды меңгеруіне және өздерінің кәсіби қызығушылықтарын жақсырақ түсінуіне көмектесетін жобаларды жүзеге асырып келеміз.

Егер бұрын біз кәсіптік бағдарлау шеберханалары арқылы қолданбалы мамандықтарды дамытуға қолдау көрсетсек, Creative Start келесі қадам болды. Бұл бағдарлама жасөспірімдерді заманауи креативті кәсіптермен таныстыруға мүмкіндік берді. Біз үшін олардың тұрғылықты жеріне немесе өмірлік жағдайына қарамастан, болашақ мамандығын таңдағанға дейін әртүрлі бағыттарда өздерін сынап көру мүмкіндігіне ие болуы маңызды», – деді Cummins Kazakhstan директоры Эль Акики Танус Михаэль.

Creative Start AYALA қайырымдылық қорының жасөспірімдерді қолдауға және жастар үшін заманауи білім беру мүмкіндіктерін дамытуға бағытталған «Кәсіптік бағдарлау» бағдарламасының бір бөлігі болды. Бағдарлама аясында алынған білім, кәсіби байланыстар мен жасалған жобалар қатысушылармен бірге оқу аяқталғаннан кейін де сақталады. Көптеген жасөспірімдер үшін бұл инкубатор болашақ мамандықты саналы түрде таңдауға жасалған алғашқы қадамға айналды. Ал кейбір командалар өз жобаларын бағдарлама аяқталғаннан кейін де дамытуды жоспарлап отыр.

«AYALA қоры үшін жасөспірімдердің өз қабілеттерін ашуына және болашақ мамандық таңдауына әсер етуі мүмкін тәжірибе алуына көмектесу маңызды. Creative Start бағдарламасы талантты әрі ынталы жастардың Қазақстанның барлық өңірінде бар екенін көрсетті.

Тәжірибелі тәлімгерлер, заманауи білім беру бағдарламалары және ірі бизнестің қолдауы қатар келгенде, жастар мақтан тұтуға лайық жобаларды жүзеге асыра алады», – деп атап өтті AYALA қорының негізін қалаушысы әрі президенті Айдан Сүлейменова.

Жоба серіктесі туралы

TransForNATION қоғамдық қоры – әлеуметтік инновациялар зертханасы және қоғамдық қор. Ол Creative Start жобасының білім беру бағдарламасын әзірлеуге, сарапшыларды тартуға, оқыту процесін ұйымдастыруға және қатысушыларды сүйемелдеуге жауапты болды.

Жоба туралы толық ақпарат пен қатысушылардың жұмыстары мына ресурстарда қолжетімді:
https://creative-start.kz/
https://www.instagram.com/creativestart_kz/