СҚО-да тағы 2 ауыл ішімдіктен бас тартты: соңғы жылдары бірде-бір қылмыс тіркелмеген

Солтүстік Қазақстанда ішімдіктен бас тартқан ауылдардың саны артуда. Айыртау ауданында Қарасай батыр және Бірлестік ауылдары 5, 7 жыл бұрын алкогольден бас тартты. Екі жағдайда да ақсақалдардың бастамасымен болды. Халық ақсақалдардың ұсынысын қолдады. Ауылдағы дүкендердің иелері де келісті - ұзақ уақыт алкогольге сұраныс болмаған.

Қарасай ауылының халқы - 263 адам. Мұнда қылмысқа немесе отбасылық дау-дамайға қатысты қиындықтар жоқ. Арықбалық ауылдық округінің учаскелік полиция инспекторы Абылайхан Рамазанов осы өлкеде 6 жыл бұрын қызмет ете бастады. Сол уақыттың өзінде ауыл республиканың солтүстігіндегі ең тыныш ауылдардың бірі ретінде белгілі болды. Абылайхан ауылға профилактикалық әңгімелесу жүргізу үшін ғана барады – ауыл тұрғындарына интернет-алаяқтық қаупі туралы айтып, оқушылардың құқықтық сауаттылығын арттыруға ат салысады.

Қамсақты ауылдық округіне қызмет көрсететін учаскелік инспектордың көмекшісі полиция кіші лейтенанты Біржан Мукеевке Бірлестіктің 486 тұрғыны да қиындық туғызбайды. Соңғы жылдары мұнда тек бір рет ғана жедел тергеу тобы шығып, мал ұрлығының ықтимал фактісін тексеруге барды. Бірақ, қылмыс расталған жоқ, себебі жоғалған сиыр мұзға батып кеткен.

Екі ауылда да спорт дамып келеді. Жастар негізінен Петропавлда немесе Көкшетауда жұмыс істейді, бірақ үнемі туған жерлеріне барып тұрады. Барлық іс-шаралар алкогольсіз өтеді - ұлттық ойындар мен жарыстардың арқасында да көңіл көтеруге болады. Бұл ретте, Қарасай ауылы атақты батырдың мемориалымен танымал екендігін айта кеткен жөн. Мұнда адамдар тарихқа үңілу үшін келеді. Ауыл тұрғындары өздерінің байсалдылық пен жеке бастарының тәртібін Отанымыздың өткен күндеріне құрмет көрсету деп біледі.

«Адамдардың алкогольден бас тартуы полицияға үлкен көмек», — дейді аудандық полиция бөлімінің бастығы полиция полковнигі Марат Серкешев. - Тәжірибе көрсеткендей: елді мекендерде алкогольді тұтыну неғұрлым аз болса, соғұрлым тыныш өмір сүруге болады. Айыртау ауданының полиция бөлімінде барлығы 22 учаскелік полиция инспекторы және олардың 6 көмекшісі қызмет атқарады. Полиция қызметкерлері тұрақты түрде қылмыс пен құқық бұзушылықтың алдын ала отыра, халықпен сенімді серіктестік орнатып, ішімдіктен бас тартқан ауылдардың қолға алған оң тәжірибесін одан әрі дамытуға тырысуда». 

СҚО ПД баспасөз қызметі

https://polisia.kz/sqo-da-taghy-2-auyl-ishimdikten-bas-tartty-songghy-zhyldary-birde-bir-qylmys-tirkelmegen/