АҚМОЛА ОБЛЫСЫНДА ӘДІЛЕТ ОРГАНДАРЫНЫҢ ҚЫЗМЕТКЕРЛЕРІ СЫБАЙЛАС ЖЕМҚОРЛЫҚҚА ҚАРСЫ ШЕКТЕУЛЕРДІ БҰЗҒАН

Ақмола облысы бойынша Сыбайлас жемқорлыққа қарсы іс-қимыл департаменті әділет органдарымен бірлесіп бейнеконференцбайланыс арқылы Қазақстан Республикасы Қылмыстық-процестік кодексінің 200-бабы тәртібінде ұсынуды қарау бойынша кеңес өткізді.

Департамент басшылығы онлайн-кездесуге қатысушыларға лауазымды тұлғаларға сыйлықтарды жіберу фактісі бойынша аумақтық Әділет департаментінің лауазымды тұлғаларына қатысты қылмыстық іс шеңберіндегі ақпаратты жеткізді.

Басшылық тарапынан тиісті бақылаудың және ұжым арасында түсіндіру жұмыстарын жүргізудің болмауы, сондай-ақ қызметкерлердің сыбайлас жемқорлыққа қарсы шектеулерді сақтамауы осы сыбайлас жемқорлық құқық бұзушылықты жасауға ықпал еткен жағдайлар болды.

Онлайн-кеңес барысында облыстық Сыбайлас жемқорлыққа қарсы ведомство басшысының орынбасары Арман Рахимов атап өткендей, әділет органдары мемлекет қызметін құқықтық қамтамасыз етуді жүзеге асыруға, ұйымдар мен азаматтардың жұмысында заңдылық режимін қолдауға және олардың құқықтары мен заңды мүдделерін қорғауды қамтамасыз етуге тиіс. Сондықтан, осы саланың әрбір өкілі өзінің қызметтік борышын адал және әділ орындауы, сонымен бірге, сыбайлас жемқорлыққа қарсы заңнама нормаларын мүлтіксіз сақтауы тиіс.

«Сондай-ақ, бағынышты қызметкерлердің арасындағы сыбайлас жемқорлық үшін басшылардың жеке жауапкершілігін күшейтуге назар аударамын. Осы тұрғыда, ұжымда сыбайлас жемқорлық көріністерін тудыратын себептер мен жағдайларды жою бойынша сапалы жұмысты қамтамасыз ету қажет, өйткені сыбайлас жемқорлыққа қарсы іс-қимыл бойынша алдын алу шараларын уақтылы қабылдау оның салдарын жойғаннан гөрі тиімді», - деп толықтырды Арман Рахимов.

Сыбайлас жемқорлыққа қарсы іс-қимыл агенттігінің Ақмола облысы бойынша департаментінің баспасөз қызметі