Ақмола облысында карантиндік фитосанитариялық бақылау актілеріне QR-код енгізілді
Мемлекеттік органдар қызметінің ашықтығын қамтамасыз ету мақсатында ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Ақмола облысы бойынша департаменті агроөнеркәсіп кешеніндегі келіп түсетін өнімге қайталама тексеру жүргізу барысында Көкшетау қалалық аймақтық инспекциясымен берілетін карантиндік фитосанитариялық бақылау мен қадағалау актілеріне арнайы QR-код енгізілді.
Аталған үдеріс тұрмыстық жемқорлықты жоюға мүмкіндік береді, себебі QR - код арқылы өнімді кімнің және қашан тексергені туралы ақпаратты алуға болады. Ол үшін, QR – кодты сканерлеу бағдарламасын телефонға жүктеу жеткілікті.
Қайталама тексеру өсімдік өнімдеріне жүргізілетінін айтып өткен жөн. Олардың ішінде дәнді, майлы, жемшөптік дақылдар, сонымен қатар ағаш тұғырықтары мен жүк тасуға арналған ыдыстар бар.
Қызмет алушының өтініш білдіруі арқылы мемлекеттік инспектор жүктің келіп жеткен орнына тексеру мақсатында барып, карантинге жатқызылған өнімді визуалдық бақылаудан соң қайталама тексеру актісін береді.
«Енді QR-кодтың көмегімен жүргізілген қайталама тексеру жөнінде толық мәлімет алуға болады. Оның ішінде тексеру жүргізген инспектордың аты-жөні, тексерудің күні мен уақыты, сонымен қатар сенім телефоны көрсетіледі. Бұл құзырлы мемлекеттік органдардың ашықтығын қамтамасыз етіп, аталған саладағы тұрмыстық жемқорлықты азайтуға жол ашады» - деп Департамент басшысы Берген Беспалинов мәлімдеді.
Еуразиялық экономикалық одағының кедендік аумағына әкелінетін Карантинге жатқызылған өнімдер тізіміне енгізілген әрбір карантинге жатқызылған өнімдердің легі карантиндік фитосанитариялық бақылауға (қадағалауға) жатқызылады. Аталған үдеріс карантинге жатқызылған өнімнің баратын жеріндегі мемлекеттік фитосанитарлық талаптарына сәйкестілігін тексеру мақсатында жүзеге асырылады.
МҚІСЖҚА Ақмола облысы бойынша департаментінің
баспасөз қызметі
[xfvalue_img]
