Цифрлы сот жүйесі

Сот билігі – Ата Заңымызда бекітілген мемлекеттік биліктің негізін құрайтын үш биліктің бір тармағы. Сот билігінің абыройы – мемлекет абыройы, оның ар-ожданы. Бұл абырой, сот билігіне әр іс бойынша заңдылыққа бағына отырып, тек шындық үстемдік құратын әділ де заңды шешімдерімен ғана, қасықтап жиналатын қоғам сеніміне ие болғанда мүмкін болары хақ. Ал мұндай халық сенімі қандай да бір өлшемге сыймайтын, көрсеткіштермен есептелмейтін – би адал, шешім әділ болғанда ғана қол жеткізе алатын әділдіктің ауыр таразысы, шындықтың шыңы.

Елбасы ұсынған «Қазақстан-2050» Стратегиясы, «100 нақты қадам» Ұлт жоспары, «Рухани жаңғыру» бағдарламалары – қоғам мен мемлекеттік құрылымның барлық саласында, соның ішінде сот билігіне де ел мүддесіне сай биік белестерге жетуді міндеттеп отыр. Бұған қоса прогрессивті IT технологияға негізделген «Цифрлы Қазақстан» бағдарламасы қоғамның қай саласына да серпінді күш, жаңа тыныс беретін бағыт.

Қазақстан – құқықтық жүйесін әлемнің озық стандарттарына сай келтіру үшін тәуелсіздіктің алғашқы күндерінен-ақ өркениетті елдер тәжірибесін тыңғылықты зерделей отырып, бүкпесіз ашық сот жүйесін қалыптастыру мақсатында кемел шаралар қабылдап келе жатқан ел. Елбасы озық сот тәжірибесін қалыптастыру мен сот өндірісін жетілдірудің негізгі көзі инновациялық технологияны кеңінен пайдалану екенін, 2009 жылы судьялардың V съезінде атап айтқан болатын. Бүгінде ол іске асып, соттар қағазбастылықтан арылып, электронды технологияға негізделген, заман талабына сай, оңтайлы, қолжетімді, ашық сот процестері базасы жасалды. Осы ретте соңғы уақытта Жоғарғы Сот жүргізіп жатқан сот жүйесін цифрландыру жұмысының қарқыны көңілге қуаныш ұялатады.  Сот жүйесін цифрландыру – сот жүйесінің қызметін кеңейтіп, әділ сот жүйесін нығайтуға өз үлесін қосып қана қоймай, сонымен қатар, кез-келген заңсыздықты уақытылы алдын алып, дер кезінде төтеп бере алатын жағдайға да жеткізетіні анық. Сот жүйесі толық цифрландыруға өткен жағдайда сот жүйесіндегі оқылықтар мен кемшіліктердің шешімі табылып, азаматтардың да сот билігіне деген сенімі артып, одан әрі нығаяры сөзсіз. Ал тәуелсіз мемлекет үшін өз Конституциясы мен ондағы сот жүйесінің қызметі және оның мақсат-міндетінің нақты әрі озық болуы міндетті.

Ақмола гарнизоны әскери сотының бас маманы А. Ахмедиева