Мемлекеттік тіл – ел бірлігінің негізі

Тіл – ұлттың рухани қазынасы, халықтың тарихы мен мәдениетін ұрпақтан ұрпаққа жеткізетін баға жетпес құндылық. Қазақстан Республикасының мемлекеттік тілі – қазақ тілі. Қазақ тілінің мәртебесін көтеру, оның қоғамдық өмірдің барлық саласында кеңінен қолданылуын қамтамасыз ету – әрбір азаматтың ортақ міндеті.

Мемлекеттік тілдің қолданыс аясын кеңейту – тек тіл мамандарының немесе мемлекеттік қызметшілердің міндеті емес. Бұл – ел азаматтарының барлығына ортақ жауапкершілік. Себебі тілге деген құрмет – туған елге, ұлттық құндылықтарға деген құрметтің көрінісі.

Мемлекеттік мекемелерде қазақ тілін дамытуға ерекше мән беріледі. Құжаттарды мемлекеттік тілде жүргізу, азаматтарға қазақ тілінде сапалы қызмет көрсету, ресми іс-шаралар мен ақпараттық материалдарды қазақ тілінде ұсыну – мемлекеттік тілдің мәртебесін арттырудың маңызды бағыттарының бірі.

Сот жүйесінде де мемлекеттік тілдің маңызы айрықша. Сот ісін жүргізу барысында заң талаптарын сақтау, азаматтардың құқықтары мен заңды мүдделерін қамтамасыз ету, сот актілерінің түсінікті әрі сауатты жазылуы – мемлекеттік тілдің кәсіби деңгейде қолданылуын талап етеді. Осы бағытта сот қызметкерлерінің қазақ тілін жетік меңгеруі және оны күнделікті қызметінде белсенді пайдалануы маңызды.

Мемлекеттік тілді меңгеру – кәсіби біліктіліктің де бір көрсеткіші. Тілді дұрыс әрі сауатты қолдану қызметтік құжаттардың сапасына, азаматтармен қарым-қатынас мәдениетіне және мемлекеттік қызметтің тиімділігіне оң ықпал етеді.

Қазіргі таңда қазақ тілін үйренуге және дамытуға қажетті жағдайлар жасалып келеді. Мемлекеттік қызметшілердің тілдік сауаттылығын арттыру, қазақ тіліндегі кәсіби терминдерді дұрыс қолдану, іс қағаздарын мемлекеттік тілде жүргізу бағытында жүйелі жұмыстар атқарылуда.

Тілді сақтау мен дамыту ең алдымен оны күнделікті өмірде қолданудан басталады. Қазақ тілінде сөйлесу, сауатты жазу, ресми құжаттарды мемлекеттік тілде дайындау – мемлекеттік тілдің өміршеңдігін қамтамасыз ететін нақты қадамдар.

Қорытындылай келе, мемлекеттік тіл – ел тәуелсіздігінің маңызды нышандарының бірі әрі қоғамды біріктіретін ортақ құндылық. Қазақ тілінің мәртебесін көтеру әр азаматтың саналы ұстанымына байланысты. Мемлекеттік тілді құрметтеп, оны қызметте және қоғамдық өмірде кеңінен қолдану арқылы біз ұлттық құндылықтарды дәріптеп, болашақ ұрпаққа қазақ тілін аманат етеміз.

БҚО қылмыстық істер жөніндегі мамандандырылған ауданаралық

сотының жетекші маманы А.С.Мұратова