Ана тіл – ұрпақ үшін негізгі құндылық
Тіл мәселесі қашан да ұлттық мүдде деңгейінде зерттелетін өзекті мәселелердің бірі. Қазіргі уақытта әлемге өзінің мәдени құндылықтарын тарату, сол арқылы үстемдік құруды көздейтін мемлекеттер алдыменен тілі мен философиясының қолданылу аясын кеңейтуге ұмтылуда. Осы себептен тілдің мәдениеттегі феноменін зерттеу, ұрпақ санасында орнықтыру кез келген мемлекет үшін өзекті мәселелердің бірі болып табылады.Қоғамдағы тіл мәселесінің негізінде ұлттық сана мәселесі жатыр.
Ұлттың тілін білген, оны жетік меңгерген адам сол ұлттың дүниетанымымен сусындап, ұлттық ойлауға дағдыланады. Тіл білімінің адамның рухани қалыптасуына, мемлекет азаматы ретінде тәрбиеленуіне әсер етуші бірден-бір құбылыс екендігін адамзат баласы, біздің де бабаларымыз ерте түсінген. Осының негізінде тілдегі сөздердің қорын байыту, дүниетанымдық ұғымдарды ғылыми айналым шеңберіне енгізу көзделді.
Ана тілінің әлеуметтік таным шеңберінде құндылыққа айналып отыруы ұрпақтың ұлттық болмыс арқылы игілікке қол жеткізуінде. Осы себептен Ахмет Байтұрсынов, «Егер де біз қазақ деген ұлт болуды тілесек, қарнымыз ашпас қамын ойлағандай тіліміздің де сақталу қамын қатар ойлау керек» – дейді. Ұрпақ ұлттық болмысынан қол үзген жерде ұлттың өзі де жоғалады. Сондықтан да, тіл ұрпақ үшін негізгі құндылық. Алаш зиялылары, сол кездегі ұлттық кодынан қол үзіп бара жатқан Қазақ елі үшін қазақ тілі қоғамдағы сөніп бара жатқан тарихи сананың шоғын үрлейтін жалғыз ғана құндылық болған. Ұрпақ ұлттық құндылықтарын біліп, ұлттық қасиеттерге ие болғанда ғана мемлекетін қорғай алады. Мемлекет мүддесін қорғауда қоғамға ауадай қажет нәрсе тәжірибе, тарихтың тағылымы, бұлар тарихи сана арқылы қалыптасады.
Қазақ руханиятындағы тарихи жыр, толғау, тарихи әңгімелер, ертегі, аңыз әңгімелер, тарихи дастандар ана тілінің білімін негіздейтін сөз өнерінің әлеуметтік танымдық негіздері болып табылады. Осы ұлттық құндылықтар арқылы тарихи сана, ұлттық сана қалыптасып, жастар ұлттық рухта тәрбиеленіп отырған.
А.Мендалиев
Жаңақала аудандық
сот әкімшісінің бас маманы – сот отырысының хатшысы
[xfvalue_img]
16 пікір