Жаңа Жолдау – оң өзгеріс
Әр Жолдаудың қоғамда алар орны ерекше. Себебі, бұл құжатты жұртшылық мемлекетті алға жетелейтін басты жоспар ретінде біледі. Жыл сайын жасалатын Жолдауда барлық сала жұмысы қамтылып, соның негізінде реформалар жасақталады.
Мемлекет басшысы Қ.Тоқаевтың 1-қыркүйектегі Жолдауында заң үстемдігі орнықпаса және азаматтардың қауіпсздігіне кепілдік берілмесе, әлеуметтік-экономикалық дамудың бірде-бір міндеті табысты жүзеге асырылмайтынын атап өтті. Бұл ретте сотқа келген әрбір тұрғынның өтінішіне құлақ асып, өтінішін тыңдау жеткіліксіз, дұрыс әрі әділ шешім шығару маңызды.
Ел Президенті азаматтардың мүддесіне қызмет ететін мемлекеттің жаңа стандарттарын әзірлеу үшін көп жұмыстар қажет екенін, осы тұрғыда құқық қорғау және сот жүйесіне ірі реформа керек екенін баса айтты. Қылмысты анықтайтын жедел қызмет өкілдері мен процессуалдық шешім қабылдайтын тергеушілердің жұмысын сынға алып, істі тезірек сотқа жіберуді басты мақсат санап, азаматтардың құқығы мен бостандығына нұқсан келтірмеуге тиіс екенін ерекше атап өтті. Кез келген өндіріске түскен істе заңдылық пен әділеттілік сөзсіз қамтамасыз етілуі тиіс. Себебі кішкене ғана қателік адам тағдырын өзгертетінін естен шығармауымыз керек.
Сонымен қатар мемлекет басшысы Қасымжомарт Кемелұлы қоғамның соттарға деген сенімін орнықтыруды басты мақсатқа айналдыру қажет екенін ерекше атады. Сот жүйесі ешкімге есік ашпайтын меңіреу мекемеге айналмай, туралықтан танбайтын әділ сот төрелігін айтатын маңызды құрылымға айналуы тиіс. Президентіміз Медиация туралы заңды да Жолдаудан тысқары қалдырмай, назар салып, тоқталып өтті. Дау-дамайды шешудің баламалық тәсілдерін одан әрі дамытып, медиация институттарына баса назар салу керектігін атады.
Биылғы Жолдау кез келген азаматтың салауатты өмір сүруі үшін маңызды делінетін барлық мәселелерді қамтыды. Елеулі мәселелерге қатысты нұсқау көрсетті, жағдайды ашып айтты. Сан түрлі саладағы проблемалармен жүйелі күресудің жолын нұсқады.
С.Танатарова, Жаңақала аудандық сотының бас маманы.
[xfvalue_img]
