АҚПАРАТТЫҚ ХАБАРЛАМА
«Ұлттық ақпараттық технологиялар» АҚ алаяқтар eGov, құқық қорғау органдарының қызметкерлері ретінде өздерін таныстырып, азаматтарға электрондық цифрлық қолтанбаның (ЭЦҚ) қолданылу мерзімі аяқталғанын хабарлайтын жалған қоңыраулардың жиілеп кеткені туралы ескертеді.
Хабарласу барысында алаяқтар телефон арқылы ЭЦҚ мерзімін «ұзартуды» немесе «қайта шығаруды» ұсынады және азаматтардан SMS арқылы келген кодпен операцияны растауды сұрайды. ЭЦҚ-ны қайта шығару үшін бір ғана SMS-код жеткіліксіз екенін білу маңызды. Ол үшін белгіленген сәйкестендіру рәсімінен, оның ішінде биометриялық аутентификациядан өту қажет.
Көбінесе алғашқы қоңырау алаяқтық схеманың бір бөлігі ғана болады. Оның мақсаты – азаматтың алаңдаушылығын туғызып, сеніміне кіру. Осыдан кейін өзін «қауіпсіздік қызметінің жұмысшысы» ретінде таныстырған екінші алаяқ қоңырау шалуы мүмкін. Ол қандай да бір қауіптің бар екенін айтып, дербес деректерге, SMS-кодтарға немесе пайдаланушының құрылғысына қол жеткізуге тырысады.
eGov және 1414 байланыс орталығының, ХҚКО-ның, құқық қорғау органдарының қызметкерлері телефон арқылы SMS-кодтарды сұрамайтынын, ЭЦҚ кілтін немесе оған арналған парольді беруді талап етпейтінін атап өтеміз.
Осыған байланысты «ҰАТ» АҚ азаматтарды келесі қауіпсіздік шараларын сақтауға шақырады:
- үшінші тұлғаларға SMS-кодтарды және ЭЦҚ деректерін хабарламау;
- бейтаныс қоңырау шалушылардың нұсқауларын орындамау;
- күмәнді сілтемелерге өтпеу;
- белгісіз қосымшаларды орнатпауға және оларға өз құрылғыңызға кіруге рұқсат бермеу;
- ЭЦҚ-ның қолданылу мерзімін өз бетінше тексеруге және тек ресми сервистерді пайдалану.
Мұндай қоңыраулар келіп түскен жағдайда әңгімеге кіріспеу, сұхбаттасушыға құпия деректерді бермеу және құқық қорғау органдарына жүгіну ұсынылады. Егер сіз алаяқтарға SMS-кодты хабарлап немесе ЭЦҚ деректерін беріп қойған болсаңыз, үрейленбеңіз. SMS-кодты алудың өзі ЭЦҚ-ны қайта шығаруға немесе несие рәсімдеуге мүмкіндік бермейді. Маңызды операцияларды жүзеге асыру үшін жеке тұлғаны қосымша растау, оның ішінде биометриялық сәйкестендіру қажет.
ЭЦҚ-ның қолданылу мерзімін eGov Mobile мобильді қосымшасындағы «Профиль» – «Менің ЭЦҚ-ларым» бөлімінен, сондай-ақ pki.gov.kz сайтында авторизациядан өткеннен кейін «Менің ЭЦҚ кілттерім» – «ЭЦҚ кілттерінің тізімі» бөлімінен тексеруге болатынын еске саламыз.
[xfvalue_img]
18 пікір