Теңізшевройл» және БҚО бизнесі ынтымақтастықтың жаңа мүмкіндіктерін талқылады

«Теңізшевройл» компаниясы Орал қаласында Батыс Қазақстан облысының бизнес өкілдерімен кездесу өткізіп, тараптар ынтымақтастықты кеңейту және жергілікті кәсіпорындардың ірі мұнай-газ жобаларына қатысу мәселелерін талқылады. ТШО делегациясын бас директордың орынбасары Қуанышкерей Мұхтаров басқарды. БҚО әкімдігі ұйымдастырған бұл кездесу соңғы уақыттағы жер қойнауын пайдаланушы мен өңірлік өндірушілер арасындағы ең ірі диалог алаңдарының біріне айналды.

Өңірлік бизнес өкілдерімен алғашқы кездесу «Атамекен» өнер сарайында өтті. Диалог алаңын Батыс Қазақстан облысының әкімдігі ұйымдастырды. Талқылаудың негізгі тақырыбы — жергілікті кәсіпорындардың ТШО жобаларына қатысуын кеңейту және отандық өндірушілермен ынтымақтастықты дамыту болды.

Кеңес басталар алдында өнер сарайының фойесінде өңірлік компаниялардың өнім көрмесі ұйымдастырылды. Жиырмаға жуық кәсіпорын мұнай-газ саласына бағытталған өндірістік мүмкіндіктерін, жабдықтары мен шешімдерін таныстырды. Қатысушылар ірі тапсырыс берушілерге жеткізіліп жатқан өнімдерін және жергіліктендіру кезеңіндегі жаңа жобаларын ұсынды.

Көрмеге қатысушылардың бірі — Қазақстан аумағында газ қауіпсіздігі қызметтерін ұсынуға маманданған «Akbarys» компаниясы болды. Кәсіпорын қызметкерлері өндірістік нысандарда ауа ортасын бақылауға арналған газ талдағыш құрылғыларын таныстырып, газданған ортада жұмыс істеуге арналған тыныс алу жабдықтарын жергіліктендіру жоспарлары туралы айтты.

Кездесу барысында атап өтілгендей, «Теңізшевройл» жергілікті қамтуды дамыту және қазақстандық кәсіпорындармен өзара іс-қимылды кеңейту жұмыстарын жалғастырып келеді. Бүгінде өңірлік өндірушілер мұнай-газ секторына мұнай мен газдың көлемі мен сапасын өлшеуге арналған жабдықтарды, құбырлы пештерді, ауа жылытқыштарды, фланцтарды, арнайы киімдер мен азық-түлік өнімдерін жеткізуде.

– Соңғы үш жылда Батыс Қазақстан облысы кәсіпорындарынан жұмыстар мен тауарларды сатып алу көлемі 156 миллион АҚШ долларына жетті, – деді өз сөзінде «Теңізшевройл» бас директорының орынбасары Қуанышкерей Мұхтаров. – Бұл қаражат арнайы киімдер мен қауіпсіздік құралдарын, инспекциялық қызметтерді, өндірістік сервистерді және басқа да тауарларды жеткізуге бағытталды. Сондай-ақ «Теңізшевройл» Үшінші буын зауыты мен Болашақ кеңейту жобасының құрылысын аяқтағанын атап өткім келеді. Осы жобаны жүзеге асыру аясында Батыс Қазақстан облысының кәсіпкерлері 118 миллион АҚШ доллары көлемінде қызмет көрсетіп, жұмыстар орындау арқылы елеулі үлес қосты. Қазақстандық қамтуды дамыту — бір реттік науқан емес, күнделікті жүйелі жұмыс. Бұл бағытта біз ашықтық пен ортақ жауапкершілік қағидаттарын ұстанамыз.

Өз кезегінде БҚО әкімінің орынбасары Қайыржан Мендіғалиев бұл кездесудің жергілікті бизнес өкілдері үшін де, өңір үшін де маңызды екенін атап өтті:

– Батыс Қазақстан облысында өңдеу өнеркәсібінің 510 кәсіпорны жұмыс істейді, олардың шамамен 50-і жер қойнауын пайдаланушыларға өнім жеткізуге бағытталған. Сонымен қатар 20-дан астам кәсіпорын ауыл шаруашылығы өнімдерін жеткізе алады. Бүгінгі көрмеде өңіріміздің ірі өндірушілері өз еңбектерінің нәтижесін, өнімдерін таныстырды.

Облыс басшылығымен кездесуден кейін «Теңізшевройл» делегациясы бірнеше кәсіпорынды аралады. Алғашқы нысан — жылыжай шаруашылығы саласындағы өңірдегі ең ірі жобалардың бірі саналатын «Бәйтерек» өнеркәсіптік жылыжай кешені болды. Кешен 2021 жылы іске қосылып, жабық топырақта жыл бойы көкөніс өсіруге бағытталған. Мұнда заманауи өсіру технологиялары қолданылады және ол өңірдегі ең технологиялық агроөнеркәсіп нысандарының бірі ретінде бағаланады.

Кейін делегация өңірдегі 70 жылдан астам тарихы бар көне өнеркәсіп кәсіпорындарының бірі — «Агрореммаш» зауытының қызметімен танысты. Көп жылдар бойы кәсіпорын ауыл шаруашылығы техникасын шығарумен айналысып келеді және зауыт өкілдерінің айтуынша, бұл дәстүрді жалғастыруда.

Бүгінде зауыт бірнеше бағытта жұмыс істейді. Негізгі бағыттардың бірі — италиялық компаниямен лицензиялық келісім негізінде IVECO техникасын құрастыру. Кәсіпорында шағын жүк көліктері мен ауыр тартқыштар құрастырылып, қытайлық брендтерді жергіліктендіру бойынша келіссөздер жүргізілуде. Екінші бағыт арнайы техникалар — өрт сөндіру көліктері, жанармай тасымалдағыштар, самосвалдар және коммуналдық техникалар өндірумен байланысты. Сонымен қатар кәсіпорын тіркемелер мен жартылай тіркемелер, соның ішінде астық тасымалдағыштар, цемент тасымалдағыштар, қышқыл тасымалдағыштар және тралдар шығарады.

Өңірге сапары аясында «Теңізшевройл» делегациясы Батыс Қазақстандағы ірі инженерлік-өндірістік және сервистік компаниялардың бірі саналатын «Топан» компаниясының өндірістік алаңында болды. Кәсіпорын мұнай-газ, тау-кен, химия және өнеркәсіп салаларына арналған жабдықтар мен химиялық өнімдерді жеткізуге маманданған. Негізгі бағыттарының қатарында мұнай мен газды өлшеу жүйелері, аналитикалық және зертханалық жабдықтар, өнеркәсіптік химия, экологиялық мониторинг және сервистік қызмет көрсету бар.

Өңірдегі көптеген кәсіпорындар үшін бұл кездесу өз өнімдері мен өндірістік мүмкіндіктерін елдегі ең ірі мұнай-газ операторларының біріне тікелей таныстыруға мүмкіндік берді. Ал ТШО өз тарапынан қазақстандық жеткізушілермен жұмысты жалғастырып, Батыс Қазақстан бизнесімен ынтымақтастықты кеңейтуге ниетті екенін мәлімдеді.