GSMA M360 Eurasia 2026 Самарқандта Еуразияның байланыс саласындағы көшбасшыларын біріктіріп, өңірдің цифрлық даму күн тәртібін ілгерілетуде

Қазақстаннан келген сала көшбасшылары Өзбекстанда бас қосып, Еуразияның 300 миллиард долларлық цифрлық болашағын айқындайтын мүмкіндіктер мен сын-қатерлерді талқылауда

2026 жылғы 20 мамыр, Самарқанд — Бүгін Самарқандта M360 Eurasia 2026 форумы өз жұмысын бастады. Іс-шараға мемлекеттік саясатты қалыптастырушылар, салалық көшбасшылар мен технологиялық инновация өкілдері қатысып, Еуразияның цифрлық болашағын жеделдету, сондай-ақ өңірдің толық цифрлық әлеуетін ашуға қажетті саясаттар мен технологияларды талқылау үшін жиналды. Бүгін жарияланған Mobile Economy Eurasia 2026 есебінің жаңа деректеріне сәйкес, мобильді экожүйе 2025 жылы өңір экономикасына 270 миллиард АҚШ доллары көлемінде үлес қосқан, бұл Еуразия ЖІӨ-нің 8,1%-ына тең. 2030 жылға қарай бұл көрсеткіш 300 миллиард доллардан асады деп күтілуде.

Форумның ашылу пленарлық сессиясында Джон Густи, GSMA ұйымының реттеуші саясат жөніндегі директоры, Еуразияның цифрлық болашағын қалыптастыратын негізгі шешімдерге тоқталып, мобильді байланыстың, 5G технологиясының, ЖИ-ге дайын мемлекеттік қызметтердің және орнықты цифрлық инфрақұрылымның маңызын атап өтті. Сонымен қатар ол ұзақмерзімді инвестициялар, теңгерімді реттеу және мемлекет пен бизнес арасындағы тығыз ынтымақтастық қажеттігін айтты.

Джон Густи, GSMA ұйымының реттеуші саясат жөніндегі директоры:
«Мобильді индустрия бүгінде Еуразиядағы экономикалық өсімнің маңызды драйверлерінің бірі болып отыр және алдағы жылдары оның рөлі одан әрі күшейе түседі. M360 Eurasia форумының Самарқандта өтуі де символдық мәнге ие. Өзбекстанның қарқынды цифрлық трансформациясы мобильді байланыстың мемлекеттік қызметтерді жаңғыртуға, өнімділікті арттыруға және өңірдегі адамдардың өмір сапасын жақсартуға қалай ықпал ететінін көрсетіп отыр», — деді.

Mobile Economy Eurasia 2026

Бүгін таныстырылған Mobile Economy Eurasia 2026 есебінде мобильді индустрияның Еуразия экономикасына қосып отырған үлесі мен өңірдің цифрлық дамуының келесі кезеңін айқындайтын негізгі басымдықтар көрсетілген.

Есептің негізгі қорытындылары:

• 2025 жылы мобильді технологиялар мен сервистер Еуразия экономикасына 270 миллиард АҚШ доллары көлемінде үлес қосты, бұл өңір ЖІӨ-нің 8,1%-ына тең. 2030 жылға қарай бұл көрсеткіш 300 миллиард долларға немесе ЖІӨ-нің 8,4%-ына жетеді деп болжануда.
• Мобильді интернет қамту аймағы кеңейіп келе жатқанына қарамастан, өңірде пайдалану алшақтығы 29% деңгейінде сақталуда. Бұл көрсеткіш қамту алшақтығынан (3%) шамамен он есе жоғары. Бұған негізгі себептер ретінде қызметтердің қолжетімділігі, цифрлық дағдылар деңгейі және пайдаланушылар сенімі аталады.
• 2030 жылға қарай Еуразиядағы барлық мобильді қосылымдардың шамамен 30%-ы 5G желілерінде жұмыс істейтін болады. Өзбекстан бұл ретте өңірлік орташа көрсеткіштен асып, 2030 жылға қарай 5G қосылымдарының үлесін 40%-дан жоғары деңгейге жеткізеді деп күтілуде.
• 2025 жылы мобильді экожүйе өңір бойынша шамамен 750 мың жұмыс орнын қамтамасыз етті.
• 2030 жылға қарай мобильді индустрияның үлесі орташа жылдық 2,4% өсім қарқынымен артады деп күтілуде. Бұл өңірлік ЖІӨ өсімінің жалпы болжамынан (1,7%) жоғары.

Pitch Day: Uzbekistan

M360 Eurasia аясында сондай-ақ Pitch Day: Uzbekistan байқауы өтуде. Бұл — IT Park Uzbekistan, IT Ventures, International Telecommunication Union және GSMA ұйымдарының бірлескен бастамасы. Жоба Өзбекстандағы ең перспективалы технологиялық стартаптарға халықаралық деңгейде өз шешімдерін таныстырып, жаһандық инвесторлар аудиториясының назарына ұсынуға мүмкіндік береді.

Жеңімпаз команда 10 мың АҚШ доллары көлеміндегі сыйақыға және MWC27 Barcelona көрмесіндегі 4YFN алаңынан арнайы көрме орнына ие болады. Жеңімпаздар туралы ақпарат іс-шараның ресми әлеуметтік желілерінде жарияланады.

Green and Digital Solutions өңірлік хакатоны

M360 Eurasia аясында Самарқандта Green and Digital Solutions өңірлік хакатонының жартылай финалы да өтеді. 21 мамыр күні ұйымдастырылатын хакатон Орталық Азия елдерінен келген жас инноваторларды біріктіріп, цифрлық инновациялар мен орнықты даму арасындағы байланысты нығайтуға бағытталады. Бұл бастама климаттық қысым күшейіп отырған өңір үшін ерекше өзекті.

Хакатонды Қырғыз мемлекеттік техникалық университеті International Telecommunication Union және GIZ PROGRESS ұйымдарымен серіктестікте ұйымдастырады.

M360 Eurasia форумы Hilton Samarkand Regency қонақүйінде өтуде және GSMA, Өзбекстан Республикасының Цифрлық технологиялар министрлігі, Beeline Uzbekistan және VEON арасындағы серіктестіктің екінші жылын білдіреді. Форумға сондай-ақ International Telecommunication Union және Өңірлік байланыс достастығы қолдау көрсетуде.

Іс-шараға тіркелу тегін және онлайн форматта әлі де ашық.