Ермек Маржықпаев басшыларға қарамағындағы қызметкерлердің жемқорлығы үшін жауапқа тартылатынын ескертті
Ақмола облысы әкімінің төрағалығымен селекторлы режимде әкімдік мәжілісі өтіп, онда бағынышты қызметкерлердің сыбайлас жемқорлығы үшін мемлекеттік органдардың бірінші басшыларының жауапкершілігі қаралды.
Аймақ басшысы атап өткендей, Мемлекет басшысы сыбайлас жемқорлыққа қарсы күресте нақты басымдықтар қойды. Заңның қабылдануымен елімізде сыбайлас жемқорлыққа қарсы іс-қимылдың жаңа кезеңі басталады. Алғаш рет басшылардың бағыныштыларға жауапкершілігі заңнамалық деңгейде бекітілген. Бұл норма Қазақстан Республикасының Президенті Қасым-Жомарт Тоқаевтың тікелей тапсырмасы бойынша заңға енгізілген.
«Тұңғыш рет басшылардың бағынышты қызметкерлері үшін жауапкершілігі заңнамалық деңгейде бекітілген. Бұдан былай, саяси мемлекеттік қызметшілер олардың тікелей қарамағындағы қызметкерлері сыбайлас жемқорлық құқық бұзушылық жасаса міндетті түрде отставкаға шығуға сұрану керек. Бірінші басшы оның тікелей бағынышты тұлғасына қатысты соттың айыптау үкімі күшіне енгеннен соң күнтізбелік 10 күн ішінде немесе ақталмайтын негіздер бойынша қылмыстық іс тоқтатылғаннан кейін отставкаға кетуге міндет.
Егер саяси емес, бірақ А және Б корпусының әкімшілік мемлекеттік қызметшілері болып табылатын барлық басқа басшыларына тәртіптік жауапкершілік қарастырылған», - деп атап өтті Е.Маржықпаев.
Кеңес соңында облыс әкімі Мемлекеттік органдардың барлық басшыларына олардың жеке жауапкершілігі туралы, әсіресе төтенше жағдай режимінде ескертті.
Айта кету керек, бюджет қаражатын мақсатты жұмсауға, еңбек ұжымдарындағы сыбайлас жемқорлықты жоюға, сондай-ақ парасаттылық қағидаттарын енгізуге ерекше назар аударылды.
Ақмола облысының ішкі саясат басқармасының баспасөз қызметі
[xfvalue_img]
