Өнеркәсіп және құрылыс министрі Моңғолия Премьер-Министрінің орынбасарымен кездесті
ҚР Өнеркәсіп және құрылыс министрі Ерсайын Нагаспаев Моңғолия Премьер-Министрінің орынбасары Ганхуяг Хассуурийнмен кездесті.
Кездесу барысында тараптар арнайы экономикалық аймақтардың қызметін, соның ішінде жерді пайдалану және инфрақұрылым ережелерін, ынталандыру саясатын, мониторинг және есеп беру жүйелерін және АЭА жұмысының озық тәжірибелерін талқылады.
«Қазіргі уақытта елде 17 арнайы экономикалық аймақ жұмыс істейді. АЭА-ның арнайы жеңілдік режимінің арқасында 532 жоба іске қосылды. 11,9 трлн теңгеге өнім өндірілді, ал төленген салықтар 656,6 млрд теңгені құрады. 337 инвестициялық жобаны іске асыру жоспарлануда», – деп атап өтті Ерсайын Нагаспаев.
Өнеркәсіп және құрылыс министрі Қазақстанның Моңғолиямен ынтымақтастықты бағалайтынын және жинақталған тәжірибесімен бөлісуге және АЭА ішінде де, одан тыс жерлерде де моңғол инвесторлары үшін қолайлы жағдайлар жасауға ниетті екенін айтты.
Одан бөлек, Моңғолияның мүддесін ескере отырып, Қазақстан бірлескен өнеркәсіптік жобаларды жүзеге асыруға және машина жасау мен жоғары қосылған құн өнімдерін қоса алғанда, қазақстандық өнімдерді жеткізуді кеңейтуге дайын екендігі айтылды. Қазақстанда өндірілген аккумуляторларды, рельс бекіткіштерін, сондай-ақ трансформаторлар мен автомобильдерді жеткізе алады.
Кездесуден кейін тараптар серіктестікті одан әрі нығайтуға дайын екендіктерін растады және сындарлы және мазмұнды диалог үшін алғыс білдірді.
2025 жылдың алғашқы 11 айында Қазақстан мен Моңғолия арасындағы жалпы сауда 121,5 млн АҚШ долларын құрады, оның ішінде 120,4 миллион АҚШ доллары өнеркәсіптік тауарлар болды.
[xfvalue_img]
