16 ЕЛДІҢ САРАПШЫЛАРЫ АЛМАТЫДА ШАЛА ТУҒАН НӘРЕСТЕЛЕРДІ КҮТІП-БАҒУДЫҢ ЗАМАНАУИ ТӘСІЛДЕРІН ТАЛҚЫЛАУДА

     24 қыркүйекте Алматыда «Шала туған нәрестелерді күтіп-бағудың заманауи тәсілдері: мультидисциплинарлық көзқарас» атты неонатология бойынша II ғылыми-практикалық конференция ашылды. 16 елден келген мамандар шала туған нәрестелерді күтіп-бағудың, өлім-жітімді төмендетудің және жаңа туған нәрестелердегі ауыр асқынулардың алдын алудың заманауи әдістерін талқылауда.

     2025 жылғы наурызда жарияланған халықаралық есептің деректеріне сәйкес, 2024 жылдың қорытындысы бойынша Қазақстанда неонаталдық өлім көрсеткіші тірі туған 1 000 нәрестеге шаққанда 3,9 жағдайды құрады. Бұл – Орталық Азия елдері арасындағы ең төмен көрсеткіш. Қазақстан дене салмағы экстремалды төмен нәрестелерді күтіп-бағуда да айтарлықтай нәтижелерге қол жеткізді: бүгінде салмағы 500 грамнан басталатын сәбилерді республикалық қана емес, өңірлік перинаталдық орталықтарда да сәтті күтіп-бағуда.

    «Дәлелді базасы жоғары бағдарламаларды, нәрестелерді күтіп-бағудың заманауи технологияларын енгізудің және қазақстандық мамандардың кәсібилігінің, сондай-ақ ДДҰ, ЮНИСЕФ, үкіметтік емес ұйымдар мен қайырымдылық қорларының техникалық қолдауының арқасында біз елеулі нәтижелерге қол жеткіздік: дене салмағы экстремалды төмен нәрестелердің өміршеңдігі төрт есе артты, ал елдегі неонаталдық өлім бес есе төмендеді. Бұл – барлық перинаталдық орталықтардың, ғылыми ұйымдар мен Денсаулық сақтау министрлігінің үйлесімді жұмысының нәтижесі. Сонымен қатар біз үшін нәрестелерді күтіп-бағу сапасы, асқынулардың алдын алу және баланың одан әрі дамуы әлі де маңызды. Конференцияда мамандар күнделікті тәжірибесінде бірден қолдана алатын нақты клиникалық шешімдерді талқылап жатырмыз», – деді Қазақстан Республикасы Денсаулық сақтау министрлігі Ана мен бала денсаулығын сақтау департаментінің директоры Мағрипа Ембергенова.

     Халықаралық лекторлар қатарында Ankara University педиатрия және неонатология профессоры Өмер Эрдеве, Durham University неонатология профессоры әрі Катардағы Sidra Medicine неонатология бөлімінің меңгерушісі Самир Гупта, неонаталдық гемодинамика және функционалдық эхокардиография саласының сарапшысы, канадалық University of Manitoba педиатрия кафедрасының доценті Яссер Эльсайед, ирландиялық University of Limerick Медицина мектебінің профессоры Рой К. Филип, Пекин университеті Үшінші ауруханасының педиатрия бөлімінің директоры Тунъянь Хань және басқа да мамандар бар.

     Конференцияда респираторлық қолдаудың заманауи стратегиялары, парентералдық және энтералдық тамақтандыру, инфекциялардың алдын алу, нейропротекция, гемодинамиканы бағалау, отбасына бағдарланған күтім, оңалту және мерзімінен бұрын туған балаларды ұзақ мерзімді бақылау мәселелері қарастырылуда.

     Жекелеген баяндамалар Қазақстандағы неонаталдық өлім динамикасына, жаңа туған нәрестелерге көмек көрсетудің отандық жүйесін дамытуға, шала туған нәрестелер ретинопатиясының алдын алуға, аудиологиялық скринингке, РСВ-инфекциясының профилактикасына, цифрлық технологияларға және неонаталдық сепсис кезінде жасанды интеллектіні қолдануға арналған. Қазақстандық мамандар Астана, Алматы, Атырау, Семей және Тараз қалаларындағы перинаталдық орталықтардың практикалық тәжірибесін таныстырады. Өзбекстан мен Қырғызстаннан келген неонатологтар өз елдеріндегі неонаталдық көмектің дамуы және жаңа туған нәрестелер өліміне аудит жүргізу тәжірибесі туралы баяндайды.

     Конференция 2024 жылы Алматыда AYALA қайырымдылық қорының қолдауымен өткен алғашқы кездесуде басталған кәсіби диалогты жалғастыруда. Қор 20 жылға жуық уақыт бойы Қазақстандағы неонаталдық өлімді және туа біткен мүгедектікті төмендетуге бағытталған Денсаулық сақтау министрлігінің бастамаларын қолдап келеді.

     «Жаңа туған нәрестелерді реанимациялау үшін заманауи жабдық қажет, алайда нәтиже, ең алдымен, медициналық команданың біліміне, дағдыларына және үйлесімді жұмысына байланысты. Сондықтан AYALA қоры реанимация бөлімдерін жабдықтаумен қатар, неонатологтарды оқытуға да қолдау көрсетеді. Конференция қазақстандық дәрігерлерге халықаралық сарапшылармен күрделі клиникалық мәселелерді тікелей талқылауға және әртүрлі тәсілдерді салыстыруға мүмкіндік береді. Біз үшін бұл білімнің Қазақстанның өңірлік неонаталдық қызметтеріне де қолжетімді болуы маңызды. Сондықтан конференцияның онлайн-трансляциясы барлық медицина қызметкерлері үшін тегін», – деді AYALA қайырымдылық қорының негізін қалаушы әрі президенті Айдан Сүлейменова.

     Конференция Қазақстан Республикасы Денсаулық сақтау министрлігінің бастамасымен ұйымдастырылды. Оны өткізуге Алматы қаласының Қоғамдық денсаулық сақтау басқармасы, Қазақстан акушер-гинекологтар және неонатологтар конгресі, Алматы қаласының Перинатология және балалар кардиохирургиясы орталығы, Астана медицина университеті және AYALA қайырымдылық қоры қатысуда. Конференцияның бас серіктесі – «U.M.C Kazakhstan» медициналық сауда компаниясы. Сондай-ақ іс-шараға AstraZeneca, Acino part Arcera, Baxter компаниялары және басқа да серіктестер қолдау көрсетуде.

Редакциялар үшін ақпарат

AYALA қайырымдылық қоры 2007 жылдан бері ана мен бала денсаулығын қорғау саласындағы жобаларды жүзеге асырып келеді. Қордың мақсаты – неонаталдық өлім мен туа біткен мүгедектікті төмендетуде мемлекетке қолдау көрсету. Қызмет еткен жылдары қор денсаулық сақтау саласындағы жобаларға 3,8 млрд теңгеден астам қаражат бағыттап, жаңа туған нәрестелердің 68 реанимация және қарқынды терапия бөлімін жабдықтауға көмектесті және 3 000-нан астам дәрігер мен мейіргердің оқуын ұйымдастырды.

Конференция сайты: www.neonatologiya.kz
Қор сайты: www.ayala.kz