Петропавл әуежайында болашақ ұшқыштарды даярлау басталды

2026 жылғы 10 қыркүйек. «Қызыл-Жар» халықаралық әуежайында Азаматтық авиация академиясының студенттерін практикалық даярлау басталды. Алты болашақ ұшқыштан тұратын алғашқы топ оқу-жаттығу ұшуларына кірісті. Оған қоса, инженерлік мамандықтардың студенттері де практикадан өте алатын оқу-өндірістік базаны дамыту мәселесі де қарастырылуда.

Қыркүйектің басында әуеайлаққа Diamond DA40 және Diamond DA42 оқу-жаттығу ұшақтары келді. Авиация дәстүріне сай оларды перронда су аркасымен қарсы алды. Екі ұшақ та төрт орындық: DA40 бір қозғалтқышпен, ал DA42 екі қозғалтқышпен жабдықталған. Бұл әуе кемелері ұшқыштарды кәсіби даярлауға арналған және ұшу бағдарламасының түрлі кезеңдерін меңгеруге мүмкіндік береді.

Петропавлда студенттер маршруттар бойынша ұшып, пилотаждық аймақтарда тапсырмалар орындайды, визуалды және аспаптар бойынша кіру дағдыларын пысықтайды. Оқу бағдарламасында түнгі ұшулар да қарастырылған. Академияның болашақ ұшқыштарына арналған практикалық даярлықтың бір бөлігі «Қызыл-Жар» әуежайының базасында өтеді.

Оқу алаңын таңдау кезінде әуе қозғалысының қарқындылығы, аймақтың жазық орманды далада орналасуы және күндізгі уақыттың ұзақтығы ескерілді. Халықаралық әуежайдың қолданыстағы инфрақұрылымымен қатар, бұл ерекшеліктер де оқу ұшуларын ұйымдастыруда маңызды рөл атқарады.

«Біз Петропавл әуеайлағын Азаматтық авиация академиясының маусымдық оқу-өндірістік базасы ретінде қарастырамыз. Жобаның негізі ретінде әуежайдың қолданыстағы инфрақұрылымы алынады, оны біз білім беру процесіне бейімдеуді жоспарлап отырмыз. Бұл ұшу даярлығы мен инженерлік практиканы бір жерде ұштастыруға мүмкіндік береді. Біз үшін студенттердің нақты жұмыс жағдайында тәжірибе жинап, ұшақтарды ұшуға дайындауды үйренуі, олардың техникалық жай-күйін бағалай білуі және әуежай қызметтерінің өзара қалай әрекет ететінін түсінуі маңызды. Әуежай үшін бұл қызметтің жаңа бағытын дамытуға және салаға кадр даярлауға үлес қосуға мүмкіндік», — деді «Қызыл-Жар» халықаралық әуежайының директоры Абул Кекілбаев.

Анықтама

Азаматтық авиация академиясы — 1995 жылы құрылған, Алматы қаласында орналасқан салалық жоғары оқу орны. Академия ұшқыштарды, авиация инженерлерін, әуе диспетчерлерін және саланың басқа да мамандарын даярлайды. Академияда колледж, бакалавриат, магистратура және докторантура деңгейлерінде білім беріліп, авиация қызметкерлерін қайта даярлау және біліктілігін арттыру бағдарламалары жүзеге асырылады. 2015 жылы академияда Ұшқыштарды даярлау орталығы ашылды. ЖОО түлектері Қазақстандағы және шетелдегі авиация кәсіпорындарында жұмыс істейді.

Orbis Group 2022 жылдан бері «Қызыл-Жар халықаралық әуежайы» ЖШС арқылы Петропавл әуежайын сенімгерлік басқаруға қатысып, оның қызметі мен дамуын қаржыландырып келеді.

Orbis қолдауымен әуежай қызметтері мен инфрақұрылымының жұмысы қалпына келтіріліп, авиаотын қоймасы қайта жаңғыртылды, терминал, авариялық-құтқару станциясы және инженерлік жүйелер жөнделді. Қаражат әуежайды күтіп ұстауға, техникаға қызмет көрсетуге және персоналды оқытуға да бағытталуда. Фаррух пен Сухраб Махмудовтар негізін қалаған Orbis Group бұл жобаға қатысу арқылы Солтүстік Қазақстан облысының көлік инфрақұрылымын сақтауға және дамытуға үлес қосады.