Сот кабинеті

Сот төрелігін жүзеге асыру, сот ісін жүргізудің ашықтығына қол жеткізу бойынша жұмыстарды оңтайландырудың бағыттарының бірі ақпараттық технологияларды кеңінен қолдану болып табылады.

Елбасының сот органдары жұмысында жаңа технологияларды қолдану халықтың сот жүйесіне деген қолжетімділігі мен барынша ашықтыққа қол жеткізуді арттыру туралы тапсырмасын жүзеге асыру мақсатымен Қазақстан Республикасы Жоғарғы Соты тұрғындар үшін сот жүйесінің қолжетімділігі мен ашықтығын қамтамасыз ету мақсатында 2014 жылдан бастап заманауи технологияларды сәтті енгізіп, жүзеге асыруда. Олар: Қазақстан Республикасы сот жүйесінің жетілдірілген Интернет-ресурстары, сот процессіне қатысушыларды SMS-хабарлама жолдау және электрондық пошта арқылы хабардар ету жүйесі, «Сот кабинеті» сервисі, «Сотқа шақыру қағазы» сервисі, сот органдарының бірыңғай 1401 нөмірі бар Call-орталығы; дыбыс-, бейнетіркеу құрылғысы, бейнеконференцбайланыс жүйесі, мемлекеттік органдардың электрондық құжат айналымының бірыңғай жүйесі.

Мұндай жаңашылдықтың бірі – сот ісін жүргізуді қысқарту үшін сот органдарының онлайн сервистері мен қызметтеріне рұқсат беретін бірыңғай терезе «Сот кабинеті» сервисі.

Сот кабинеті –сот ісін жүргізуді жеңілдету және азаматтар үшін сот жүйесінің қол жетімділігін қамтамасыз ету мақсатында іске асырылған ақпараттық жүйе.

Әрбір сотқа жүгінген азамат «Сот кабинеті» арқылы арыз беру үшін жергілікті Халыққа қызмет көрсету орталықтарында электронды цифрлы қолтаңба алуы қажет.

Жеке және заңды тұлғалардың кез-келген өзіне ыңғайлы уақытта, үйден немесе кеңседен шықпай-ақ, онлайн режиміне «Сот кабинеті» интернет-сервисі (www.sud.kz) арқылы электронды түрде талап қою арыздарын (арыздарды) беруге, шағымдар мен өтінішхаттарды жолдауға, сондай-ақ, істің қаралу барысын бақылауға мүмкіндіктері бар. Сонымен қатар, барлық уәкілетті мемлекеттік органдарға әкімшілік құқық бұзушылық істерді электронды форматта жолдау мүмкіндігі де қарастырылып отыр.

            Ал, енді техникалық қолдау қызметіне өтінішті рәсімдеу ережелерін айта кетсек, өтініштерді «Сот кабинеті» электрондық ақпараттық сервисінің пайдаланушыларын техникалық қолдау қызметіне office@sud.kz мекен жайы бойынша электрондық поштаға жіберу қажет.

            Мемлекетімізде жасалып жатқан ізгі бастамалардың барлығы қарапайым халықтың қамы үшін қолға алынған шаралар. Заманауи электрондық қызмет сот төрелігінің ашықтығы мен қолжетімділігіне бағытталғандығын ескерген жөн.

Г.Суюнова

Мұғалжар аудандық сотының бас маманы