Заңғар биік заңгер
Әміртаева Алмагүл Рахымжанқызы 1960 жылдың 01 маусымында Жамбыл облысы Қордай ауданы Қаракемер ауылында дүниеге келген. 1999 жылы Абай атындағы Алматы мемлекеттік университетінде «Құқықтану» мамандығын бітіріп, «заңгер» біліктілігін алды.
1977-1979 жылдар аралығында Қордай ауданының орта мектебінде лаборант болып жұмыс істейді.Одан әрі Қасым ханның қасқа жолымен, Есім ханның ескі сүрлеуімен жүрген қазақ халқының қаны бойында бар жиырма жасқа да толмаған жас қыз әділеттіктін ақ туын көтеріп, құқық бағытындағы еңбек жолын бастаған еді.
1979-2001 жылдар аралығында Алматы қаласы Әуезов аудандық халық сотының хат тасушысы, сот мәжілісінің хатшысы, сот орындаушысы, аға сот орындаушысы қызметін атқарады.
2001-2003 жылдар аралығында Алматы қаласы Соттар әкімшісі бақылау және құжаттамалық қамтамасыз ету бөлімінің бастығы.
Қазақстан Республикасы Президентінің 2003 жылғы 15 қаңтардағы №1015 «Облыстық, аудандық және соған теңестірілген сот қызметіне тағайындау және қызметтен босату» туралы жарлығымен 27 қаңтар 2003 жылдан қазіргі уақытқа дейін Астана қаласы Сарыарқа аудандық сотының судьясы болып қызмет атқарды. Осы жылдар аралығында әділетсіздік пен құқық бұзушылыққа жол бермей, құқықтық мемлекет құру жолында аянбай еңбек етті.
«Тура биде туған жоқ, туғанды биде иман жоқ», - деген нақыл сөзді үнемі назарда ұстанған ол дүние мүлкін де адалынан жиып, үкіметтін екі бөлмелі пәтеріне де қанағат тұтқан болатын. Құқықтық сауатсыздықты болдырмау мақсатында ант беріп, өзін «Әділет жаршысы» ретінде таныта білді. Артынан еріп келе жатқан жеткіншек заңгерлерге өсиет айтып, өнеге көрсетіп тәжірибесімен бөлісуге еш жалықпайтын. Мысқалдап кірген ауру батпаңдай болып шыңбайына батса да еш сыр берместен жұмысын ыждахаттылықпен орындай берді, тіпті ауруханаға да тікелей жұмыс орнынан түсті.
Ғибратты ғұмыр, өнегелі өмірінде заң аясында алтын баптармен өрнек салып, өз ізін қалдырып кетті.
Жас пен кәріні, хан мен қараны таңдамайтын сұм ажал жанымызда жүрген жайсаң жанды біздің арамыздан әкетіп, бақилыққа тапсырған еді.
Алмагүл Рахымжанқызының жатқан жері жайлы, топырағы торқа болсын дей келіп, марқұмның туыстарына қайғыра көңіл айтамыз.
[xfvalue_img]
23 пікір