Петропавлда жыл басынан бері 38 әйел полицияның сенім телефонына жүгінді
https://youtube.com/shorts/uElCZoae8mI?feature=share
Петропавл қаласы полиция басқармасының қызметкерлері жастар ресурстық орталығының волонтёрларымен бірге тұрмыстық зорлық-зомбылық пен сталкинг мәселесіне қала тұрғындарының назарын аудару үшін көшелерге шықты. Іс-шара «Отбасындағы зорлық-зомбылықсыз Қазақстан» республикалық акциясы аясында өтті.
Ақ ленталар, «Мен отбасындағы зорлық-зомбылыққа қарсымын» деген жазуы бар автокөлік жапсырмалары мен ақпараттық буклеттер тұрмыстық зорлық-зомбылық әркімге тікелей болмаса да, жақындарының мәселелері арқылы әсер етуі мүмкін екенін еске салды.
Жыл басынан бері Петропавлда отбасылық-тұрмыстық қатынастар саласындағы құқыққа қарсы әрекеттері үшін 654 адам әкімшілік жауапкершілікке тартылды.
Зорлық-зомбылық белгілерін дер кезінде танып, көмекке жүгінуге кеңес бере білу маңызды. Солтүстік Қазақстан облысының тұрғындары полицияның сенім телефонына 8 (7152) 49-31-58 нөмірі арқылы, ал петропавлдықтар 8 (7152) 612-530 нөмірі арқылы хабарласа алады. Сондай-ақ «111» ұлттық сенім телефонына немесе «102» арнасына жүгінуге болады.
Петропавл қаласы полиция басқармасы бастығының орынбасары Айдын Ахмағамбетовтің айтуынша, қаңтар айынан бері облыс орталығының 38 тұрғыны сенім телефонына кеңес алу үшін хабарласқан. Олардың 16-сы кейіннен арыз жазып, құқық бұзушылар әкімшілік жауапкершілікке тартылған.
Полицейлер нысаналы топтармен кешенді жұмыс жүргізуде. Атап айтқанда, жоғары сынып оқушылары мен студенттер арасында буллинг пен зорлық-зомбылықтың өзге де түрлерінің алдын алуға бағытталған кездесулер ұйымдастырады.
Бүгінде қалада 853 адам профилактикалық есепте тұр. Тәртіп сақшылары оларды тұрғылықты жері бойынша тексеріп қана қоймай, психологтармен кездесулерге шақырып, басқа да іс-шаралар өткізеді.
Сонымен қатар отбасылық-тұрмыстық зорлық-зомбылықтың алдын алу бойынша рейдтер тұрақты негізде жүргізілуде.
СҚО ПД баспасөз қызметі
[xfvalue_img]
34 пікір