Елордалық сотта Қазақстан Республикасының Тұңғыш Президенті күніне орай шахматтан турнир өтті

Нұр-Сұлтан қаласы соты және Нұр-Сұлтан қаласы бойынша Судьялар Одағы филиалының ұйымдастыруымен елордалық соттардың арасында шахматтық турнир өткізілді.

Турнир Қазақстан Республикасының Тұңғыш Президенті күніне орайластырылып мереке алдында өз мәресіне жетті.

Шахмат ойыны интеллектуалды қабілетті арттыратын  ақыл-ой спорттың бір түрі және әлемге танымал ойын екені баршамызға мәлім.

Сот қызметкерлері арасында спорттық ойын түрлерінен сайыстар ұйымдастыру ұжымдағы ауызбіршілікті нығайтуға, сайыскерлік рухты көтеруге және адамның бойындағы ойлау қабілетін шыңдауға бағытталады.

Елорда соттары арасынан 30 ойыншы іріктеп алынып, ой жүйріктігін талап ететін сайысқа судьялар мен сот мамандары қатысты.  

Сайыс олимпиадалық жүйе бойынша «Swiss Manager» компьютерлік жеребе тарту бағытымен жүргізілді.

Турнирдің финалы Нұр-Сұлтан қаласында орналасқан Динара Садуақасованың Шахмат академиясының шахмат ойыны платформасында өтті.

Финал мәресіне шахматтың жілігін шағып, майын ішкен 16 ойыншы суырылып шығып, шахматтық партияның 4 айналымынан өтті.

Білікті мамандардан жасақталған комиссия мүшелері финал нәтижесінде жүлделі орындарға қол жеткізген үздіктерді анықтады.

Шахмат турнирінің жеңімпаздары Қазақстан Республикасының Тұңғыш Президенті күні мерекесіне арналған салтанатты іс-шарада марапатталды.

I орынды Нұр-Сұлтан қаласының мамандандырылған ауданаралық әкімшілік сотының судьясы Берік Сәтбаев иеленді.

Персоналды басқару бөлімінің басшысы – Азамат Шойбеков II орын иеленді.

III орынды Сарыарқа аудандық соты кеңсесінің сот приставы Ернар Ордабек қанжығасына байлады. 

Нұр-Сұлтан қаласы сотының  баспасөз қызметі