Қазақстан «Орталық Азия – Корея Республикасы»16-шы ынтымақтастық форумына қатысты

Қазақстан Республикасы Премьер-Министрінің орынбасары - Сыртқы істер министрі Мұрат Нұртілеу бастаған қазақстандық делегация «Орталық Азия - Корея Республикасы» ынтымақтастық форумының 16-шы отырысына қатысты. Іс-шараға сондай-ақ Корея Республикасы, Қырғыз Республикасы, Тәжікстан Республикасы, Түрікменстан және Өзбекстан Республикасы Сыртқы саяси ведомстволарының басшылары қатысты.

Отырыс барысында қатысушылар көлік және логистика, денсаулық сақтау және медицина, климаттың өзгеруі және қоршаған ортаны қорғау, ақпараттық-коммуникациялық технологиялар, білім және ғылым, сондай-ақ туризм саласындағы ынтымақтастық мәселелерін талқылады.

Министрлер өз елдерінің басымдықтарын және Орталық Азия мемлекеттерінің Корея Республикасымен өзара іс-қимылының контурларын белгіледі.

ҚР сыртқы саяси ведомствосының басшысы өз сөзінде Қазақстан форумның Орталық Азия елдері мен Корея Республикасы арасындағы өзара тиімді ынтымақтастықты дамытуға қосқан үлесін жоғары бағалайтынын атап өтті. «Біздің ортақ кең күн тәртібімізді тиімді ілгерілету өңір елдерінің жаһандық бәсекеге қабілеттілігін арттыруға ықпал етеді», - деп мәлімдеді М.Нұртілеу.

Тұтастай алғанда, Орталық Азия мемлекеттері мен Корея Республикасы арасындағы өзара құрмет пен тиімділік негізінде көпжоспарлы ынтымақтастықты жандандыру өңірдің ортақ мүдделеріне жауап береді және орнықты дамудың маңызды факторы болып табылады.

Іс-шара қорытындысы бойынша Орталық Азия елдері мен Корея Республикасы делегациялары басшыларының бірлескен мәлімдемесі қабылданды.

Форум «алаңында» ҚР Сыртқы істер министрі Корея Республикасының Сыртқы істер министрі Пак Чжинмен кездесу өткізіп, онымен екіжақты ынтымақтастық және көпжақты форматтағы өзара іс-қимыл мәселелерін талқылады.

Тараптар екі елдің қазіргі саяси ынтымақтастығын жоғары бағалады және сауда-инвестициялық өзара іс-қимылдың дамуына қанағаттанушылықтарын білдірді. 2022 жылдың қорытындысы бойынша тауар айналымы 6 млрд. АҚШ долларына жетті, ал ҚР-дағы Оңтүсітк Корея инвестицияларының көлемі 1.5 млрд. АҚШ долларынан асты.