Елордада шетелдік туристер жиі баратын орындарда туристік полиция бекеттері жұмыс істейді.

Туристік полицияның заманауи үлгідегі стационарлық бекеттері шетелдік туристер жиі баратын орындарда орнатылған. Аталған бөлініс өз қызметін сәуір айынан бастап жүзеге асырады және шетелдік азаматтардың Қазақстан Республикасының астанасында болуы кезеңінде қауіпсіздігін қамтамасыз етуге арналған.

Мысалы, туристік полиция модульдерінің біреуі тек қана қала тұрғындарының ғана емес, сонымен қатар шетелдік қонақтардың да баратын көрікті жерлерінің біріне айналған  «Бәйтерек» монументінде қызмет етеді.

Туристік полиция қызметкерлері шет тілін меңгерген және шетелдік қонақтарға көмек көрсетуге дайын. Оларға тек қана  шетелдік қонақтар ғана емес, сонымен қатар қала тұрғындары және өзге өңірлерден келген қонақтар да жүгіне алады.

Аталған бөліністің полиция қызметкерлері туристерге көмек көрсетуден басқа құқық бұзушылықтың алдын алады, ақпараттық қызмет көрсетеді, туристік нысандарда мәселелердің шешілуіне көмек көрсетеді.

Нұр-Сұлтан қаласы ПД Жергілікті полиция қызметі басқармасының  бастығы Госман Жакиннің айтуынша туристік полиция модульдерінің саны болашақта артатын болады. Бұл жерде шетелдік қонақтардың ұнатып баратын ең сүйікті жерлеріне басымдық беріледі. Заманауи модульдер жақын арада «Ғашықтар саябағы» (Тұран даңғылы бойында) және ЭКСПО аумағында орнатылады.

Нұр-Сұлтан қаласы әкімдігінің қолдауымен туристік полиция модулі және жеке құрам барлық материалдық-техникалық құрылғылармен жабдықталған.

Қазіргі кезде Тәуелсіздік көшесінде  (Бейбітшілік және келісім сарайы) және «Бәйтерек» монументінде туристік полицияның бекеттері тәулік бойы қызмет етеді.

Нұр-Сұлтан қ. ПД баспасөз қызметі