ШҚО-да сыбайлас жемқорлыққа қарсы тақырыпта театрландырылған қойылым көрсетілді

Мемлекеттік қызметшілер арасында сыбайлас жемқорлыққа қарсы мәдениетті қалыптастыру мақсатында ШҚО Сыбайлас жемқорлыққа қарсы қызметінің бастамасымен облыстық Драма театрында «Көлеңке» эксперименттік драмасының көрсетілімі өтті (авторы Р.Отарбай, қоюшы-режиссер Д. Құбаш). 

«Көлеңке» спектаклінде сыбайлас жемқорлық көріністері, заңсыз баюға деген ұмтылыс бір отбасының тағдырына қалай кері әсер еткені көрсетілген. Алайда, спектакль соңында адал полиция қызметкерлерінің үйлесімді жұмысының арқасында қылмыскерлер ұсталып, әділдік орнайды.

«Бұл бастама Үкіметтің сыбайлас жемқорлыққа қарсы іс-қимыл саласында ақпараттық жұмыс жүргізу туралы Қаулысын орындау аясында ұйымдастырылды. Осы спектакльді көріп, әріптестеріміз отбасы құндылықтары, парасаттылық пен адалдық туралы ойланады деп үміттенеміз», - деп атап өтті ШҚО Антикор басшысының бірінші орынбасары Талғат Башев.

Сондай-ақ, шара барысында ШҚО сыбайлас жемқорлыққа қарсы қызмет басшысының бірінші орынбасары Талғат Башев мемлекеттік қызметшілерге сыбайлас жемқорлыққа қарсы іс-қимыл саласындағы соңғы өзгерістер туралы баяндама жасады және мемлекеттік қызметшілерге сыбайлас жемқорлық құқық бұзушылықтары үшін жауапкершілік туралы жадынамалар таратылды.