Қылмыстық істер жөніндегі мамандандырылған ауданаралық әскери сот әкімшісінің жұмысы – әділеттілік пен тәртіптің тірегі

Сот жүйесінің тұрақты әрі тиімді жұмыс істеуінде сот әкімшісі қызметтің маңызы зор. Әсіресе, әскери қызметшілер мен оларға теңестірілген тұлғаларға қатысты қылмыстық істерді қарайтын Қылмыстық істер жөніндегі мамандандырылған ауданаралық әскери соты әкімшісінің мақсаты – соттың төрағасы мен судьяларының жұмысын ұйымдық қамтамасыз ету.

Сот әкімшісінің қызметі – үлкен жауапкершілік пен кәсіби шеберлікті талап ететін сала. Сот әкімшісінің басшысы соттың ұйымдастыру-шаруашылық жұмысына жетекшілік етіп қана қоймай, оның материалдық-техникалық базасының нығаюына, сот ісін жүргізудің тиімділігіне тікелей ықпал етеді. Сот әкімшісінің басшысы сот отырыстарының уақытылы өтуі, сот құжаттарының сапалы рәсімделуі, тәртіптің сақталуы және іс қағаздарының дұрыс жүргізілуін қадағалайды.

Қазіргі құқықтық мемлекет жағдайында әскери соттардың рөлі айрықша. Әскери қызметтің өз ерекшеліктері мен тәртібі бар болғандықтан, оған қатысты даулар мен қылмыстық істерді қарау – арнайы мамандандырылған соттардың құзыретіне жатады. Осы орайда, Қылмыстық істер жөніндегі мамандандырылған ауданаралық әскери соттың жұмысы құқықтық тәртіп пен әділеттілікті қамтамасыз етуде маңызды орын алады.

Әскери соттағы ерекшелік – бұл жерде қаралатын істер әскери қызметпен тығыз байланысты. Сондықтан мұнда қызмет атқаратын әкімші әскери тәртіп пен жауапкершілікті жақсы түсінуі тиіс. Ол сот әкімшісі қызметкерлерінің жұмысына басшылық жасап, қызметтік тәртіптің, мемлекеттік құпияның сақталуын қамтамасыз етеді.

Сонымен қатар соттың қызметін ұйымдық, материалдық-техникалық және өзге де қамтамыз етудің жағдайы туралы Әскери сотының департаментіне ақпарат дайындау, сот статистикасын жүргізу, сот мұрағатын жүргізу, шаруашылық есеп беру және сыбайлас жемқорлыққа қарсы іс-қимылға бағытталған шаралар қабылдайды және сыбайлас жемқорлыққа қарсы шаралардың қабылданбауы үшін дербес жауапкершілік мәселелерді де үйлестіреді. Мұндай көпқырлы міндеттер сот жұмысының үздіксіз әрі тиімді жүруіне кепіл болады.

Қызмет барысында сот әкімшісінің басшысы заңнамалар мен нормативтік актілерді жете меңгеріп, өзгерістерге жедел бейімделе білуі тиіс. Бұл – кәсіби біліктілікпен қатар, үлкен ұқыптылық пен табандылықты талап ететін жұмыс.

Қорытындылай келе, Қылмыстық істер жөніндегі мамандандырылған ауданаралық әскери сот әкімшісінің қызметі – сот жүйесінің артында тұрған, көпшілік байқай бермейтін, бірақ өте маңызды буын. Бұл – әділеттіліктің жүзеге асуына жанама емес, тікелей әсер ететін қызмет. Сот әкімшісі – тәртіп пен заңның тұрақты тірегі.

Еңбегі еленбейтін емес, елге қызмет ететін бұл қызмет иесінің жұмысы – құқықтық мемлекеттің іргесін бекітіп, заң үстемдігін қамтамасыз ету жолындағы маңызды міндет.

Қылмыстық істер жөніндегі мамандандырылған ауданаралық

әскери сот әкімшісінің басшысы Н.Жунисова