Жыл басынан «102» мобильді қосымшасына петропавлдықтар 38 рет жүгінді
Петропавл тұрғындарын көбінесе жол жүрісі қағидаларының бұзушылықтары алаңдатады – бұны олардың «102» мобильді қосымшасы арқылы полицияға жүгінуінен байқауға болады. Ең жиі көтерілген тақырып – автокөліктің дұрыс қойылмауы және жол қозғалысы ережелерінің басқа да бұзушылықтары. Мысалы, 19 жастағы жүргізуші өзінің «Lexus» автокөлігін Бостандық көшесіндегі жаяу жүргіншілер аймағына қойып кеткен. «102» қосымшасына келіп түскен хабарлама бойынша ол әкімшілік жауапкершілікке тартылды. Алтынсарин көшесіндегі тротуарда тұрған «Nissan» автокөлігінің иесі де, Интернационал көшесіндегі ойын алаңында қалдырған «Lada» автокөлігінің иесі де жазаланды.
Петропавл қаласы полиция басқармасының басшылығы атап өткендей, әрбір хабарлама дереу тіркеліп, мұқият тексеріледі, тексеру нәтижелері бойынша процессуалдық шешім қабылданады және бұл туралы пайдаланушыға хабарланады. «102» қосымшасы полициямен көп арналы байланыс орнатуға мүмкіндік береді. Кез келген қылмыс пен құқық бұзушылық туралы мәтіндік немесе дауыстық хабарлама түрінде хабарлауға, аудио немесе бейне қоңырау шалуға, фотосурет немесе бейнежазба қоса жіберуге болады. Тәжірибе көрсеткендей, петропавлдықтар көбінесе мәтіндік хабарламаларды таңдайды. Жыл басынан аталған қосымша арқылы 38 қоңырау қабылданды, оның 30-ы жол жүрісі қағидаларын бұзуға қатысты.
Сондай-ақ түнгі уақытта тыныштықты бұзу бойынша – 5, өзге мәселелер бойынша – 3 өтініш тіркелді. «102» қосымшасы — полиция қызметтерінің қолжетімділігін арттыратын көпфункционалды құрал».
СҚО ПД баспасөз қызметі
[xfvalue_img]
28 пікір