ҚазҚСҒЗИ мамандары жаңа құрылыс конструкцияларына сынақ жүргізді
«ҚазҚСҒЗИ» АҚ сынақ базасының эксперименттік стендінде Қазақстан Республикасының аумағында пайдаланылатын жаңа желдетілетін қасбеттік құрылыс жүйелеріне сынақ жүргізілді.
Жоғары қабатты ғимараттардың сейсмикалық төзімділігі зертханасының меңгерушісі Жасұлан Омаровтың айтуынша, жүргізілген зерттеулердің міндеттеріне сейсмикалық типтегі жүктемелердің әсерінен қасбеттік жүйелер жұмысының ерекшеліктерін зерттеу кірді. Сонымен қатар, мамандар қасбеттік жүйелердің конструкциялары мен ғимараттардың тірек конструкциялары арасындағы қосылыстардың жұмыс қабілеттілігін тексерді, сонымен қатар жер сілкінісіне төзімді құрылыста қасбеттік жүйелерді қолданудың тиісті саласын анықтады.
Сондай-ақ мамандар ғимараттардың қабаттары мен сейсмикалық жүктемелердің әртүрлі деңгейлеріндегі қасбеттік жүйелердің жағдайын зерттеді. Өткізілген сынақтар V негізгі кезеңді қамтыды. Сынақ барысында қасбеттік жүйелерге динамикалық әсер ету деңгейі біртіндеп I кезеңнен V кезеңге дейін өсті.
Өз кезегінде «KAFT» компаниясының басшысы осы конструкциялардың қай жерде қолданылатынын айтып берді.
«Біз «KAFT» компаниясының ішкі жүйесін Клинкер, HPL панелі, талшықты цемент панелі, kalesinterflex жұқа керамикасы, сондай-ақ алюминий композиттік панельдері қаптау материалдарында сынап көрдік. Қорытындыны алғаннан кейін нарыққа сенімді түрде шығатын боламыз. Бұл материалдарды мектеп, тұрғын үйлер, жеке үйлер, яғни салынып жатқан барлық нысандарда пайдалануға болады деп жоспарлануда», - деді Нұрлыбек Қайнарбай.
Қасбеттік жүйелерді эксперименттік зерттеу екі қабатты арнайы стендте жүргізілді. Стендтің тербелісі оның төбесіне орнатылған В-2 типті діріл машинасымен қозғалды.
Мұндай машинаны қолдану сынақ кезінде зерттелетін жүк көтермейтін қабырға құрылымдарын жүктеудің динамикалық сипатын жүзеге асыруға және сейсмикалық типтегі жүктемелер кезінде олардың құрылыс жүйесіндегі қандай да өзгерістердің негізгі ерекшеліктерін модельдеуге мүмкіндік берді.
Анықтама үшін: Вибродинамикалық сынақтың мақсаты – Қазақстан құрылысында қолданылатын құрылыс материалдары мен конструкцияларының беріктігін эксперименттік тексеру.
ҚР Өнеркәсіп және құрылыс министрлігі
баспасөз қызметі
[xfvalue_img]
