Сенімхат элекронды түрде жолданады
Сот жүйесіне енгізіліп жатқан реформалар заманауи технологиялармен тығыз байланысты. Төреліктің ашықтығы мен қолжетімділігін қамтамасыз ету мақсатында енгізілген бастама жыл сайын жетілдіріле түсуде. Мәселен, бүгінгі таңда «Сот кабинеті» сервисінің қызметі кеңінен қолданылады.
Жақында тұтынушыларға жаңа қызмет түрі таныстырылды. Соған сай, сотқа жүгінушілер сенімхатты рәсімдеу үшін бұрынғыдай нотариусқа барып әуреге түспей-ақ, электронды түрде бірден сотқа жолдай алады. Қызметті пайдалану үшін алдымен «Сот кабинетіне» тіркеліп, ондағы «Электронды сенімхат» бөліміне өту керек. «Сенімхат» ашылған соң, «Қосу» түймесін басып, сенімхатпен қоса тиісті деректерді толтыру қажет. «Электронды сенімхат» қызметі ҚР Азаматтық кодексінің 167-бабына сәйкес әзірленген. Сенiм бiлдiрушiнiң өз атынан өкiлдiк етуі үшiн екiншi адамға (сенiм бiлдiрген) берген жазбаша уәкiлдiгi сенiмхат деп танылады. Азаматтық процестік кодекстің 61-бабы 1-бөліміне сәйкес, сенімхатты сенім білдірушінің электрондық цифрлық қолтаңбасымен куәландырылған электронды құжат нысанында рәсімдеу көзделген. Электронды сенімхатты бірнеше сенімді өкілге беруге болады, сенімді өкілдер саны заңмен шектелмейді. Электронды сенімхатты тоқтату Азаматтық кодекстің 170-бабына сәйкес жүзеге асырылады. Бүгінгі таңда «Сот кабинеті» сервисінің қызметін пайдаланушылардың қатары артып келеді. Ал, сенімхатты электронды жолдау мүмкіндігінің тууы аталған қызмет түріне деген сұранысты ұлғайтары сөзсіз.
Б.АЛИЕВ,
Астана қалалық мамандандырылған
ауданаралық экономикалық сотының судьясы
[xfvalue_img]
