Сот - мемлекеттік биліктің бір тармағы

Кез келген өзін демократиялық деп санайтын қоғамның іргелі қағидасы заң үстемдігі болуы тиіс. Сот билігі - қоғамның және азаматтардың құқықтары мен заңды мүдделерін заңсыз қол сұғушылықтан қорғайтын, заңның мүлтіксіз орындалуын қадағалайтын, ата-заңымызда бекітілген мемлекеттік биліктің негізін құрайтын үш биліктің бір тармағы.

Мемлекет басшысы 2019 жылдың 2 қыркүйегінде «Сындарлы қоғамдық диалог - Қазақстанның тұрақтылығы мен өркендеуінің негізі» атты өзінің тұңғыш Қазақстан халқына Жолдауын жариялап, онда сот шешімдерінің сапасын арттыруға, бірыңғай сот тәжірибесін орнықтыруды қамтамасыз етуге, азаматтар мен мемлекеттік органдар арасындағы дауларды шешудің ерекше тетігі ретінде әкімшілік әділет құрылымын енгізу және одан әрі дамытуға бағытталған бірқатар маңызды шараларды жүзеге асыру жөнінде тапсырмалар берді.

Республика Президенті қызметіне ресми кірісу рәсімінде халықтың табысын арттыру, сыбайлас жемқорлықты жою және сот және құқық қорғау жүйесін реформалауды айта келіп, «Сот - заң үстемдігінің кепілі. Сот - әділдіктің соңғы шегі болуы тиіс...» екендігін және сот төрелігін одан әрі жетілдіру қажеттілігін атап өткен болатын. Мемлекет басшысының бұл сөздері Республикамыздың судьялар корпусымен толық қолдау тауып отыр.

Еліміз егемендік алып, тәуелсіздік тәжін киген алғашқы жылдардан бастап, бүгінгі күнге дейін Республикамыздың Сот жүйесі де өзінің бірнеше даму кезеңдерінен өтті. Ұлт Жоспары аясында соттарды одан әрі жаңғыртудың маңызды құралы болып табылатын «Сот жүйесінің жеті түйіні» басым бағыттарын жүзеге асыру бойынша ауқымды жұмыстар атқарылып, нәтижесінде сот жұмысы жетілдіріліп, ол азаматтар үшін мейлінше ашық әрі қолжетімді бола түсті.

Соңғы жылдарда электрондық сот төрелігіне ерекше назар аударылып, ол халық тарапынан оң бағасын алып та үлгерді. Цифрландыру - қоғамның соттарға деген сенімін арттырудың іргелі факторы болып табылады себебі, жаңа технологиялар сот төрелігін айқын және қолжетімді етіп қана қоймай, оны болжамды етеді.

Құқық үстемдігі – заң үстемдігі . Қоғам өмірінде заң үстемдігі арқылы азаматтардың құқықтарының шынайылығы әрі мызғымастығы, олардың сенімді құқықтық мәртебесі, заңдық қорғалуы қамтамасыз етіледі. Ал, халықтың соттарға деген сенімі жоғары болғанда ғана, Заң үстемдігі салтанат құрады.

 А.У.Кожина   

Ақтөбе гарнизоны әскери                             

сотының кеңсе меңгерушісі