Өнеркәсіпті дамыту қоры мен «СТ Эсембли» ЖШС арасында ынтымақтастық меморандумына қол қойылды

ҚР Индустрия және инфрақұрылымдық даму министрі ауыл шаруашылығы техникаларын өндірушілермен кездесті.

Атап айтқанда, ведомство басшысы CLAAS, HORSCH және Royal Ressing компанияларының өкілдерімен өзара ынтымақтастықты арттыру жайын жан-жақты талқылады.

Кездесу барысында Қайырбек Өскенбаев қазақстандық тарап кооперациялық әріптестікті одан әрі дамытуға мүдделі екендігін атап өтті. Осы ретте ИИДМ ауыл шаруашылығы техникасын өндіру және оны оқшаулау бағытындағы бірлескен жобаны одан әрі іске асыру үшін жан-жақты қолдау көрсетуге ниетті.

Кездесу соңында «Өнеркәсіпті дамыту қоры» АҚ мен «СТ Эсембли» ЖШС арасында меморандумға қол қойылды. Ағымдағы жылы Өнеркәсіпті дамыту қоры арқылы тракторлар мен комбайндарды лизингтік қаржыландыру үшін 7 млрд теңге қаржы бөлу жоспарланған. Ал «СТ Эсембли» тарапынан тұтынушыларға техниканың барынша қолжетімділігін қамтамасыз ету мақсатында техника құнын бекіту бойынша шара ұсынылмақ.

Ал CLAAS ауыл шаруашылығы техникасын шығаратын зауыт өткен жылы «Qyzyljar» арнайы экономикалық аймағында іске қосылған болатын. Кәсіпорын бір жылдың ішінде 400-ден астам техника шығарып, өндірілген өнімнің жалпы құны 40,6 млрд теңгені құрады. Бүгінде зауытта 40-қа жуық адам еңбек етеді.

ҚР ИИДМ баспасөз қызметі