Көлік министрлігінің басшылығы ауыл тұрғындарын онлайн режимде қабылдады

Көлік министрі Amanat партиясының республикалық қоғамдық қабылдау бөлмесінде азаматтарды онлайн қабылдады. Марат Қарабаевпен кездесуге Ақмола, Алматы, Қостанай және Түркістан облыстарының тұрғындары қатысты. Азаматтардың өтініштері ауылдық елді мекендердің көлікке деген қолжетімділігін жақсарту, теміржол саласындағы еңбек қатынастары, жергілікті жолдарды жөндеу және жол инфрақұрылымының қауіпсіздігін арттыруға қатысты болды.

Ақмола облысы Қажымұқан ауылының тұрғыны А.Сейітова Астана қаласымен автобус қатынасын жолға қоюды сұраса, қостанайлық А.Федоренков "ҚТЖ – Жүк тасымалы" ЖШС вагондық пайдалану депосы бастығының лауазымын қысқарту себептерін сұрады. Түркістан облысы Түлкібас ауданының ауылдық округ әкімі А.Айдарбеков облыстық маңызы бар жолдардағы шамадан тыс жүктемені бақылау мәселесін көтерді. Алматы облысының тұрғыны З.Кутанов Заречное ауылы арқылы өтетін Алматы-Талдықорған жолы арқылы жаяу жүргіншілер өткелін салу мәселесін шешуді сұрады.

Министр өтініш білдіргендерге заңнама шеңберінде жауап берді. Састөбе ауылындағы Амангелді көшесіне қаражат бөлу мәселесі бойынша Марат Қарабаев бүгінгі таңда ұзындығы 1,8 км жолды орташа жөндеуге техникалық құжаттама әзірленіп жатқанын хабарлады. Оң қорытынды алғаннан кейін әкімдік жергілікті бюджет есебінен іске асыру мәселесін қарайтын болады.

Заречное ауылына жерүсті өткелін салуға қатысты өтініш берушіге автомобиль жолының 54 + 300 км учаскесінде жерүсті өткелін салуға биылғы бюджетті нақтылау кезінде қаражат бөлу үшін өтінім қалыптастыру туралы айтылды (құрылыстың болжамды құны 450 млн теңге). Өтінім белгіленген тәртіппен биыл наурыз айының соңына дейін қаралатын болады. 

ҚР Көлік министрлігінің баспасөз қызметі