Электрондық атқару парақтары. Сот актілерін орындау

Ата Заңымыз - Конституцияның 76 бабының 3 тармағы және ҚР Азаматтық іс жүргізу кодексінің 21 бабына сәйкес соттардың шешімдері, үкімдері мен өзге қаулылары барлық мемлекеттік органдармен, жеке және заңды тұлғалармен міндетті түрде орындалуы тиіс.

Сот шешімін орындау тәртібі ҚР Азаматтық  іс жүргізу кодексінің 241 бабында көрсетілген. Аталған бап бойынша сот шешімі  заңды күшіне еңгеннен кейін атқару парағы жазылады, ол өндіріп алушыға беріледі не оның жазбаша өтініші бойынша, сот оны борышкердің мекен-жайына байланысты, аумағы бойынша атқарушылық іс жүргізудің тиісті органына орындау үшін жібереді.

Соттың шешімі шыққаныменен, оның орындалуы бөлек бір мәселе, өйткені сот шешімін орындау басқа органға – мемлекеттік және жеке сот орындаушыларына жүктелген.

Атқару құжаты тек қағаз жүзінде емес сондай-ақ электронды атқару құжаты нысанында қолданылады. Яғни, жеке сот орындаушысы соттың өзінен келіп түскен электронды атқару құжаты негізінде де атқару өндірісін қозғайды. Арызданушы жеке сот орындаушыға атқару құжатын өз бетімен ұсынғанда атқару құжаты соттың мөрімен және судьяның қолымен куәландырылуы тиіс. «Атқарушылық іс жүргізу және сот орындаушыларының мәртебесі туралы» Қазақстан Республикасының Заңының (әрі қарай-Заң) талаптарына сай жеке тұлғалар атқарушылық iс жүргiзуге дербес немесе өкiлдерi арқылы қатыса алады Арызға өндіріп алушы не оның өкілі қол қояды. Өкіл оның өкілеттігін куәландыратын сенімхатты немесе өзге де құжатты арызға қоса береді. Заңның 11-бабының 1-тармағында сот актілері негізінде берілетін сот бұйрықтары мен атқарушылық парақтар – 3 жыл ішінде орындауға ұсыну қажет.

Шығарылған сот актілерінің толығымен орындалмайынша жеке тұлғалардың немесе заңды тұлғалардың бұзылған құқықтары мен бостандықтары қалпына келтірілді деуге болмайды.

Қазақстан Республикасында азаматтық құқықтық қатынасын реттейтін заң барлығына ортақ, сондықтан сот шешімін арыз беруші жағына шығарылса, оның орындалуы жауапкерге жүктелген міндет деп есептеймін.

Ақмола гарнизоны

әскери сотының

бас маманы А.Сайлауова