Үшінші жаңғыру ел үшін өте тиімді

Елбасы Нұрсұлтан Назарбаевтың «Қазақстанның үшінші жаңғыруы: жаһандық бәсекеге қабілеттілік» жолдауының таныстырылғанына көп бола қойған жоқ. Құжатта экономиканы құрылымдық жаңартудың негізгі бағыттары дәл, әрі жан-жақты көрініс тапқан. Сонымен бірге, озық елдердің қатарына қосылуды мақсат еткен Қазақстандағы білім саласын дамыту, руханиятты жаңғырту, қауіпсіздік шараларын күшейту, әлемді алаңдатып отырған діни экстремизмнің алдын алу мәселелеріне басымдық берілген. Осыған орай, құзырлы орындар тарапынан құжаттың негізгі тетіктерін жұртшылыққа таныстыру, түіндіру жұмыстары жүйелі түрде жүргізілуде. Халық қалаулылары бастамашылық танытқан мұндай іргелі істер сот құрылымдарында да жалғасын тауып жатыр. Астана қаласы Есіл ауданының № 2 аудандық сотында да Елбасы жолдауын насихаттауға байланысты жұмыстар жүргізіліп жатыр.

«Қазақстанды Үшінші жаңғырту жөнінде міндет қойып отырмын. Елдің жаһандық бәсекеге қабілеттілігін қамтамасыз ететін экономикалық өсімнің жаңа моделін құру қажет. Қазіргі кезде көптеген елдер осындай міндетті орындауға ұмтылуда. Өсімнің жаңа моделіне көшу тәсілі әр жерде әртүрлі екеніне сенімдімін. Біз өзіміздің мықты тұстарымызды пайдаланып, Тәуелсіздігіміздің 25 жылында бірге қалыптастырған әлеуетімізді жоғалтып алмауымыз керек» деген Елбасы өз жолдауында үшінші жаңғыруға негіз болатын бес жолды атап өтті.

Мұндағы бірінші басымдық экономиканың жеделдетілген технологиялық жаңғыртылуын көздейді. Елде 3D-принтинг, онлайн-сауда, мобильді банкинг, цифрлық қызмет көрсету секілді перспективалы салаларды дамытуды тапсырған Елбасы Үкіметке «Цифрлық Қазақстан» деген атпен жеке бағдарлама әзірлеуді міндеттеді. Осыған орай заңнамаларды да жаңа жағдайға бейімдеу қажеттілігі атап өтілді. Жолдаудағы екінші басымдық бизнес-ортаны түбегейлі жақсарту және кеңейтуді мақсат етеді. Ал, шағын және орта кәсіпкерлікке кедергі келтірмеу, кәсібін өркендетуге кесірін тигізетін кедергілерді жою осы сала өкілдеріне ғана тиесілі мәселе болмауы керек. Олардың қауіпсіз ортада, еркін жұмыс істеуіне заңнамалық тұрғыдан да, мемлекет тарапынан да қамқорлық қажет. Үшінші басымдық – макроэкономикалық тұрақтылықты қалыптастыруды көздесе, жолдаудағы төртінші басымдық адами капиталдың сапасын жақсартуға негіз қалайды. Бесінші басымдық – институционалдық өзгерістерге, қауіпсіздікке және сыбайлас жемқорлықпен күреске қатысты жасалып отыр. Жоғарыда көрсетілген бесбасымдықтыңда көрсетілген межеде сапалы орындалуына еліміздің әрбір азаматы мүдделі. Біз осыған дейінгі екі жаңғыру кезінде де діттеген жерден табылдық. Мұның барлығы елдің Елбасына сенгенінің, жолдауда берілген тапсырмаларды көп болып атқаруының жемісі деп бағалағанымыз дұрыс. «Көп ізденген көмбе үстінен шығады» дейді дана халқымыз. Сол айтпақшы, бүгінгі ізденісіміз ертеңгі ірі істерге негіз боларына сенеміз.

Астана қаласы Есіл ауданының №2

аудандық сотының кеңсе меңгерушісі

Жанар Ерназарова