Сот заңсыз орнатылған ақылы тұрақ алаңдарын алып тастау туралы істі қарады
Нұр-Сұлтан қаласының Мамандандырылған ауданаралық экономикалық соты Нұр-Сұлтан қаласы әкімдігінің «Астананың тұрақ кеңістігі» ЖШС-не 2018 жылғы ақылы тұрақ кеңістігін құруға, пайдалануға және басқаруға арналған шартты бұзу және паркоматтарды алып тастауға мәжбүрлеу туралы талап арызы бойынша істі қарады.
Талап қою жауапкер «Астананың тұрақ кеңістігі» ЖШС-нің 44 тұрақ аймағында көлік құралдары иелерінен ақы алуды заңсыз жүзеге асыратындығымен негізделген.
Материалдарға сәйкес, «Астанада көлік құралдарын орынтұраққа қойғаны үшін ақы алуға және олардың орынтұрақта тұрған уақытын есептеуге арналған сертификатталған арнайы құрылғылармен жабдықталған орындарды айқындау туралы» 2017 жылы әкімдіктің қаулысымен елорданың барлық аумағында 10 000 тұрақ орнын орналастыру үшін 536 жер учаскесі бөлінген.
Көрсетілген қаулыны орындау үшін 2018 жылғы 7 қарашада талап қоюшы мен жауапкер арасында қаланың ақылы тұрақ кеңістігін құруға, пайдалануға және басқаруға №1 мемлекеттік жеке меншік әріптестік шарты жасалды, оған көрсетілген 536 жер учаскесінің ішінен талап қоюшы жауапкерге 487 тұрақ орнын орнату үшін «Нұржол» гүлзары ауданында тек 24 жер учаскесін берді.
Сот шарт талаптарына қарамастан, жауапкер «Нұржол» гүлзары аймағына кірмейтін және шарт бойынша әкімдік бермеген жер учаскелерінде орналасқан 44 тұрақ аймағы бойынша төлемақы алатынын анықтады.
Талап қоюшының жауапкер тарапынан Шарт талаптарын бұзу туралы дәлелдері расталғандықтан, сот шешімімен талап қою талаптары толық көлемде қанағаттандырылды.
Шешім заңды күшіне енген жоқ.
[xfvalue_img]
