ITA Airways жасанды интеллектке негізделген шешім арқылы отын шығыны мен CO₂ шығарындыларын қысқартады

SITA OptiFlight® әрбір әуе кемесіне тән деректер мен нақты уақыттағы ауа райы деректерін пайдаланып, көтерілу тиімділігін арттырады және шығарындыларды өлшенетін деңгейде азайтуға мүмкіндік береді

Жасанды интеллект технологияларын қолдану арқылы көтерілу профилін оңтайландыру Италияның ұлттық әуе тасымалдаушысы ITA Airways-ке отын шығынын азайтуға көмектеседі. Авиакомпания қазірдің өзінде нақты нәтижелерге қол жеткізіп, 2025–2026 жылдары 7 100 тоннадан астам отынды үнемдеуді және CO₂ шығарындыларын 22 100 тоннадан астам қысқартуды жоспарлап отыр. SITA OptiFlight® шешімімен қолдау көрсетілетін деректерге негізделген тәсіл операциялық тиімділікті арттыруға, өлшенетін нәтижелерге қол жеткізуге және шығындарды азайтуға мүмкіндік береді.

SITA OptiFlight® шешімі ITA Airways әуе паркінің барлық әуе кемелеріне енгізілген және әрбір рейс үшін көтерілу профилін оңтайландырады. Бұл жылдамдықты, үдеуді, биіктік деңгейлері арасындағы өтулерді және көтерілу кезеңіндегі Мах санын оңтайландыру арқылы жүзеге асырылады. Сонымен қатар, болжамдық талдау, машиналық оқыту және төртөлшемді (4D) ауа райы деректері қолданылады.

SITA OptiFlight® әрбір әуе кемесіне арналған жеке модельдерді (tail-specific) қолданады, бұл әртүрлі пайдалану және ауа райы жағдайларын ескере отырып, дәл көтерілу профильдерін қалыптастыруға мүмкіндік береді. Мұндай тәсіл ITA Airways компаниясының тұрақты даму қағидаттарына бейілділігін және деректерге негізделген тиімділікті арттыруға деген ұстанымын айқындайды.

ITA Airways компаниясының инновациялар және стратегиялық жобалар жөніндегі директоры Франческо Презичче:

«ITA Airways-та біз инновациялық технологиялар ұзақ мерзімді даму мен тұрақты өсу стратегиямызды іске асырудың негізгі факторы екенін жақсы түсінеміз. SITA OptiFlight® шешімін енгізу компанияны тиімді, практикалық және нақты нәтижелер беретін құралдармен қамтамасыз етуге деген ұстанымымызды көрсетеді, сонымен қатар жоғары операциялық тиімділікті сақтауға мүмкіндік береді. Деректерге негізделген талдау мен жасанды интеллект бізге тиімділік пен қауіпсіздікке нұқсан келтірмей, отын шығыны мен шығарындыларды айтарлықтай қысқартуға мүмкіндік береді. Бұл бастама тұрақты және жауапты авиацияны дамытуға бағытталған кең ауқымды стратегиямыздың бір бөлігі болып табылады, және біз бұл үдерісте жетекші рөл атқарамыз», — деді.

Шешімнің әуе паркінің барлық әуе кемелеріне енгізілуі ITA Airways компаниясының тұрақты авиациялық операциялар саласында жетекші орынға ұмтылысын айқындайды.

SITA for Aircraft бас директоры Янн Кабара:

«Авиация саласы операциялық тиімділікті сақтай отырып, шығарындыларды жедел қысқарту қажеттілігіне тап болып отыр. ITA Airways-тің SITA OptiFlight® шешімін енгізуі деректерді тиімді пайдаланудың нақты нәтижелерге жеткізетінін көрсетеді. Отын шығыны — реттеушілік және экологиялық қысымның күшеюі жағдайында авиакомпаниялар үшін негізгі мәселелердің бірі әрі операциялық шығындардың ең ірі баптарының бірі болып қала береді. Нақты уақыттағы деректер мен болжамдық модельдеуді пайдалану ITA Airways-ке ұшу тиімділігін сақтай отырып, отын шығыны мен шығарындыларды азайтуға мүмкіндік береді. Бұл әріптестік авиациядағы тұрақты дамуға қол жеткізуде цифрлық трансформацияның маңызды рөл атқаратынын көрсетеді», — деді.

SITA туралы

SITA — авиация саласына арналған IT-шешімдер жеткізушісі. Компания авиакомпанияларға, әуежайларға, әуе кемелеріне және мемлекеттік органдарға арналған технологияларды ұсынып, әуе тасымалдарын анағұрлым ыңғайлы, қауіпсіз және тұрақты етеді.

SITA әлем бойынша шамамен 2 500 клиентке қызмет көрсетеді. Компанияның шешімдері 1 000-нан астам әуежайда операциялық тиімділікті арттырып, 18 000-нан астам әуе кемесінде қолданылады. Сонымен қатар, SITA 70-тен астам мемлекетке шекара қауіпсіздігі мен сапарлардың ыңғайлылығы арасындағы теңгерімді сақтауға көмектеседі. Компанияның жаһандық байланыс желісі бүкіл әлемді қамтиды, ал оның технологиялары авиация саласындағы деректер алмасудың шамамен 45%-ын қамтамасыз етеді.

2023 жылы Science Based Targets (SBTi) бастамасы SITA компаниясының шығарындыларды қысқартуға арналған қысқа және ұзақ мерзімді мақсаттарын бекітті. Бұл ғылыми негізделген мақсаттар компанияның климаттық стратегиясының негізін құрайды. Сонымен қатар, SITA отын шығынын азайту және операциялық тиімділікті арттыру арқылы авиация саласының көміртегі ізін төмендетуге бағытталған шешімдерді әзірлеуде.

2024 жылы SITA жолаушыларға қызмет көрсету саласындағы жетекші компаниялардың бірі — Materna IPS-ті сатып алып, әуежайлар мен цифрлық саяхаттарға арналған ең ірі шешімдер портфелінің бірін қалыптастырды. Сондай-ақ, компания ASISTIM-ді сатып алып, авиакомпаниялардың ұшуды басқару орталықтарына арналған толық басқарылатын қызметтерді ұсына бастады. Бұдан бөлек, SITA SmartSea бастамасын іске қосты, ол теңіз саласына авиацияда қолданылатын озық технологияларды қолжетімді етеді. Бұл компанияның круиздік тасымалдар, теміржол көлігі және қалалық әуе мобильділігі бағыттарына кеңею стратегиясының бір бөлігі.

SITA толықтай салаға тиесілі және 200-ден астам ел мен аумақта қызмет көрсетеді.

ITA Airways туралы

ITA Airways — Италияның ұлттық әуе тасымалдаушысы. Компанияның 59%-ы Италияның Экономика және қаржы министрлігіне, ал 41%-ы Deutsche Lufthansa AG-ке тиесілі. ITA Airways жолаушылар және жүк тасымалдарын жүзеге асырып, елдің халықаралық және ішкі бағыттардағы байланыстығын қамтамасыз етеді, сондай-ақ туризм мен сыртқы сауданың дамуына ықпал етеді.

Компания қызмет көрсету сапасын арттыру және жекелендірілген сервистерді дамыту үшін цифрлық технологияларды белсенді енгізуде, осылайша клиент тәжірибесін өз стратегиясының негізгі элементіне айналдырған. Сонымен қатар, ITA Airways экологиялық, әлеуметтік және басқарушылық аспектілерді қамтитын тұрақты даму қағидаттарын ұстанады.

ITA Airways — әлемдегі жетекші әуе альянсы Star Alliance мүшесі, ол жолаушыларға бүкіл әлем бойынша ыңғайлы әрі үздіксіз саяхат жасауға мүмкіндік береді.