ҚР Сыртқы істер министрі Оман Сұлтандығына ресми сапармен келді
Қазақстан Республикасы Премьер-Министрінің орынбасары – Сыртқы істер министрі Мұхтар Тілеуберді Оман тарапының шақыруымен Оман Сұлтандығына ресми сапармен келді.
Қазақстан Сыртқы істер министрінің Оманға сапары екі мемлекет арасындағы дипломатиялық қатынастар орнағаннан бері өткен 30 жылдың ішінде алғаш рет өтіп жатыр. Сапардың ресми бөлігі М.Тілеубердінің Оман Сұлтандығы Премьер-Министрінің Халықаралық қатынастар және ынтымақтастық жөніндегі орынбасары Асад бин Тарикпен келіссөздерінен басталды.
Тараптар екіжақты ынтымақтастықтың негізгі бағыттары мен халықаралық күн тәртібіндегі өзекті мәселелерді талқылады. «Оман Сұлтандығы тәуелсіздіктің алғашқы жылдарында Қазақстанға қолдау көрсеткен алғашқы мемлекеттердің бірі. Біз сіздің еліңізбен ынтымақтастыққа үлкен мән береміз», – деді ҚР СІМ басшысы.
Жоғары деңгейдегі байланыстарды дамыту қажеттілігі атап өтілді. Сұхбаттастар екіжақты ынтымақтастыққа жаңа серпін беруге өзара ұмтылысын білдірді. М.Тілеуберді ҚР Президенті Қасым-Жомарт Тоқаевтың Оман Сұлтаны Хайтам бин Тарикке арнаған жолдауын табыс етті.
Қазақстан СІМ басшысы М.Тілеуберді Оман Сыртқы істер министрі Бадр әл Бусаидимен келіссөздер жүргізіп, оның барысында тараптар саяси, сауда-экономикалық, инвестициялық және мәдени-гуманитарлық ынтымақтастықтың кең ауқымды мәселелерін талқылады. Қазақстан мен Оман арасындағы ынтымақтастықтың серпінді және үдемелі дамуы аталып өтті.
Кездесу қорытындысы бойынша сыртқы саяси ведомстволардың басшылары бірлескен комиссия құру туралы үкіметаралық келісімге, сондай-ақ саяси консультациялар туралы меморандумға қол қойды. Тараптар Қазақстан-Оман бірлескен комиссиясы шеңберінде жан-жақты ынтымақтастықты одан әрі тереңдетуге, атап айтқанда сауда-экономикалық және инвестициялық салалардағы өзара іс-қимылды жандандыруға уағдаласты.
М.Тілеуберді сондай-ақ Қаржы министрі Сұлтан әл Хабсимен келіссөздер жүргізді, онда Қазақстанда исламдық қаржыландыруды дамыту тақырыбы талқыланды. Қазақстандық тарап осы саладағы бірлескен жобаларды іске асыру үшін «Астана» халықаралық қаржы орталығының алаңын қарастыруды ұсынды.
Тараптар екіжақты тауар айналымын дамытуда елеулі әлеуеттің бар екендігін атап өтіп, қосарланған салық салуды болдырмау туралы үкіметаралық келісім жасасу қажеттігін атап өтті.
Қазақстан мен Оман арасындағы тауар айналымының көлемі 2022 жылғы қаңтар-қарашада 6,2 млн АҚШ долларын құрады және 2021 жылғы ұқсас кезеңімен (2,1 млн. доллар) салыстырғанда екі еседен астам өсті. 2005 жылдан бері Оманнан Қазақстан экономикасына салынған инвестициялар көлемі 253,4 млн АҚШ долларына жетті. 1998 жылы Оман Астана қаласындағы «Салтанат сарайының» құрылысына 10 млн долларды тегін бөлді.
Қазақстан Республикасы Сыртқы істер министрлігінің
баспасөз қызметі
[xfvalue_img]
31 пікір