Цифрлық сауаттылықтың төмен деңгейі мен деректердің таралып кетуі - бизнес үшін киберқауіпсіздіктің негізгі мәселелері

«Kaspersky»-дің* сауалнамасына сәйкес, киберқауіпсіздіктің негізгі мәселелері қызметкерлердің цифрлық сауаттылығының төмен деңгейі (22%) және кибершабуылдар нәтижесінде деректердің таралып кетуі (23%) болып табылады. Ақпаратты қорғауға көбірек көңіл бөлу бизнес басшыларын болашақ немесе қазіргі жеткізушілердің ашықтық саясатын бірінші орынға қоюға мәжбүр етеді.

Интернетте сақталған және адамдар алмасатын ақпарат көлемі өсуде. IDC болжамдарына сәйкес 2025 жылға қарай әлемдегі деректер көлемі 180 зеттабайтты құрайды. Барған сайын пайдаланушылар компаниялардың олардың деректерімен қаншалықты қауіпсіз жұмыс істейтіні туралы ойланады. Тиісінше, бизнес үшін ақпаратты қорғау бірінші кезектегі міндетке айналады.

АТ жетекшілері арасында жүргізілген «Kaspersky»-дің жаһандық зерттеуі басқарушылардың жартысынан көбі (55%) АТ-қауіпсіздігінің ең маңызды мәселесі деректердің таралып кетуіне байланысты корпоративтік және тұтынушылық ақпараттың ашылуы деп санайтынын көрсетті. Басқа жиі кездесетін мәселелердің қатарында барған сайын күрделі технологиялық орталарды қорғау құны (43%) және бұлттық инфрақұрылымды енгізу мәселелері (38%) бар.

Сондай-ақ, компаниялар өздерінің жеткізушілері мен мердігерлерінің ашықтық саясатына үлкен мән беретіні анықталды: респонденттердің 91% - ы ашықтық саясатының болуы жеткізушімен немесе мердігермен жұмысты бастаудың маңызды шарты деп санайды. Дүние жүзіндегі сауалнамаға қатысқан ұйымдардың 78% - ы өз ұйымдарында ашықтық саясатын жүзеге асырып жатыр, 81% - ы ресурстарды одан әрі дамытуға инвестициялауға дайын екендіктерін растады.

«Бүгінде бизнес киберқауіпсіздік мәселелерінде аса жауапты болды. Компаниялардың көпшілігі қауіпсіздік саясатын енгізуге назар аударуда, - деп түсіндірді «Kaspersky»-дің Қазақстан, Орталық Азия және Моңғолиядағы басқарушы директоры Валерий Зубанов. - Цифрлық сенім «Kaspersky» үшін әрқашан басымдық болған. Біз өз клиенттеріміз бен серіктестерімізге шешімдеріміздің сенімділігін растайтын құралдарды ұсынып қана қоймай, сонымен қатар ашықтық индустрияда стандартқа айналуы үшін жұмысты жалғастырамыз».

Шабуылдар мен ақпараттың таралып кету қаупін азайту үшін «Kaspersky» соңғы құрылғыларды қорғау үшін қауіптерді анықтау және оларға жауап беру мүмкіндіктері дәлелденген шешімдерді пайдалануды ұсынады. Басқарылатын қызметтер сервистері ұйымдарға сарапшылардың көмегімен шабуылдарды зерттеуге көмектеседі. Сондай-ақ, компанияларға цифрлық сауаттылық бойынша тренингтер өткізу қажет. Олар қызметкерлердің кінәсінен болған оқиғалардың қаупін азайтуға мүмкіндік береді.

Компаниялардың 2022 жылы киберқауіпсіздікке жұмсаған шығындары туралы толығырақ Kaspersky IT Security Calculator сайтынан біле аласыз.

* «Бизнестің ақпараттық қауіпсіздігі» сауалнамасын «Kaspersky» 2022 жылы жүргізді. Оған 26 елден 50-ден астам қызметкері бар компаниялардың 3 230 маманы қатысты.