Республика бойынша ең алғаш Жамбыл облысында «Арқан» мобильді кешені қолданысқа енгізілуде

Ағымдағы жылдың 18 желтоқсанында «Батыс Еуропа-Батыс Қытай» республикалық маңызы бар тас жолында «Арқан» автоматтандырылған мобильді кешенін таныстыру шарасы өткізілді. Аталған іс-шараға Жамбыл облысы Полиция департаментінің басшы және жеке құрамы, сондай-ақ бұқаралық ақпарат құралдарының өкілдері қатысты.

Маңызды шарада Полиция департаментінің бастығы полиция полковнигі Арман Оразалиев сөз сөйлеп:

- Өңірімізде жол-көлік оқиғаларының алдын алуда Полиция департаментімен бірқатар іс-шаралар  атқарылуда. Осы мақсатта Жамбыл облысы әкімінің қолдауымен Республикалық маңызы бар автожолдарда қызмет көрсететін патрульдік полиция көліктеріне он бірлік «Арқан» мобильді кешенін орнатып, қолданысқа беріп отырмыз. Мобильді кешен облыстың жол-көлік оқиғасы көп орын алатын аумақтарында қызмет көрсететін болады. Сондай-ақ, автоматтандырылған режимде полиция қызметкерлерінің қатысуынсыз бақылау жүргізеді. Айта кетерлік жайт, аталған құрылғы республика бойынша біздің облыста алғаш рет қолданысқа енгізілуде. Кешенді қолданысқа енгізу арқылы біз жолдағы апаттылық деңгейін төмендетуге қол жеткіземіз деген ойдамыз - дей келе, құрылғының мүмкіндіктерін жан-жақты таныстырып өтті.

«Арқан» мобильді кешені жолдың бақыланатын аймағы арқылы өтетін барлық көліктердің нөмірлік белгілерін, түсі мен маркасын тануға, белгіленген жылдамдықты арттыру деректерін тіркеуге қабілетті. Бұл құрылғының көмегімен айыппұл туралы ақпараттар деректерді өңдеу орталығына және Бас прокуратураның әкімшілік өндірістерінің бірыңғай тізіліміне автоматты түрде жіберілетін болады. Сонымен қатар, полиция қызметкерінің жүргізушімен қарым-қатынасын болдырмай, сыбайлас жемқорлықтың жолын кесуге мүмкіндік береді.

Бұдан бөлек, көлік құралының танылған нөмірлік белгісі бойынша полицияның іздестіруінде немесе жүргізушінің бұрын жасаған әкімшілік құқық бұзушылық үшін борышкерлер тізімінде болуы автоматты түрде тексеріледі. Бұл жағдайда мобильді кешендегі полиция инспекторы заңға сәйкес құқық бұзушыға қатысты жедел әрекет ету шараларын қабылдай алады.

«Арқан» мобильді кешені ағымдағы жылдың 20 желтоқсанынан бастап бір ай көлемінде тесттік режимде жұмыс істейтін болады. Көрсетілген мерзімде жол-көлік оқиғаларының дерегі төмендеп, оң нәтижеге қол жеткізген жағдайда мобильді құрылғының санын арттыру жоспарлануда.

Жамбыл облысы Полиция департаментінің Баспасөз қызметі