ҚРКФ делегациясы Түркияның TÜRK-IŞ кәсіподақтар конфедерациясының 24-ші конгресіне қатысты

Бейсенбі, 30 қараша күні Түркия Республикасының астанасы Анкара қаласында ҚРКФ төрағасы Сатыбалды Дәулеталин бастаған ҚР Кәсіподақтар Федерациясының делегациясы Түркияның TÜRK-IŞ кәсіподақтар конфедерациясының 24-ші кезекті конгресінің жұмысына қатысты.

TÜRK – IŞ түрік кәсіподақтары конфедерациясы – 1952 жылы құрылған және 35 салада мүшелік ұйымдары бар Түркия Республикасының ең ірі ұлттық Кәсіподақ орталығы. TÜRK – IŞ кәсіподақ мүшелерінің саны 1 миллион 400 мың адамды құрайды. Конфедерацияның тоғыз Аймақтық өкілдігі (Стамбул, Бурса, Измир, Адана, Диярбакыр, Мармара, Эскишехир, Сивас және Солтүстік Кипр Түрік Республикасы) және бүкіл елде жұмыс істейтін 81 провинциялық өкілдіктер бар. TÜRK-IŞ – Халықаралық кәсіподақтар конфедерациясының және Еуропалық кәсіподақтар конфедерациясының және ЭЫДҰ жанындағы Кәсіподақтар Консультативтік комитетінің мүшелік ұйымы.

Конгресс жұмысын аша отырып, TÜRK-İŞ түрік кәсіподақтары конфедерациясының Президенті Эргюн Аталай кәсіподақтар өздерінің риторикасын өзгертпейтінін атап өтті – кәсіподақтардың жұмысшылардың әл-ауқатын жақсарту жөніндегі іс-әрекеттеріндегі тиімділік күн тәртібіндегі басты мәселе болып қала береді. Ол Түркия, Қазақстан, Әзірбайжан, Қырғызстан және Өзбекстанның Ұлттық кәсіптік орталықтары бар түркі мемлекеттерінің Кәсіподақтар ұйымын құруды тарихи қадам деп атады.

24-ші TÜRK-IŞ Конгресінің делегаттарына Қазақстан Республикасы Кәсіподақтар федерациясының төрағасы – Түркі мемлекеттері кәсіподақтар ұйымының Бас хатшысы Сатыбалды Дәулеталин сөз сөйледі. Ол Қазақстан мен Түркияның бауырлас мемлекеттері ынтымақтастығының басымдығын атап өтті.

«Қазақстан мен Түркия - ортақ тарихи тамыры бар бауырлас, достас елдер. Қазақ халқы тәуелсіздігімізді бірінші болып Түркия мемлекеті мойындағанын мәңгі есте сақтайды. Қазақстанның тұңғыш елшілігінің Анкарада ашылуының символдық мәні бар. Қазақстандық мигранттардың түрік жерінен пана тапқанына биыл 71 жыл толды. Сол кезде Түркияның премьер-министрі болған Аднан Мендерес оларға үлкен көмек көрсетті. Алматыдағы көшелердің бірі осы көрнекті саясаткердің есімімен аталды. Түркия республикасының 100 жылдығына орай Қазақстанда бірқатар нысандар ашылды: Астанадағы Анадола көшесі, Шымкенттегі "Түркия" даңғылы мен паркі, Алматыдағы Мұстафа Ататүрік пен Астанадағы Юнус Эмраға арналған ескерткіштер» , - деді Сатыбалды Дәулеталин.

Айта кету керек, 2019 жылы Қазақстан Республикасының Кәсіподақтар федерациясы мен Түркияның TÜRK-IŞ кәсіподақтар конфедерациясы арасында ынтымақтастық туралы келісімге қол қойылды. Қазіргі таңда Қазақстан мен Түркияның ұлттық кәсіптік орталықтарының өзара іс-қимылы қарқынды дамып келеді. Түркі мемлекеттерінің кәсіподақтар ұйымының I Конгресінде эргюн Аталай Ұйымның Президенті болып сайланды, ҚРКФ төрағасы Сатыбалды Дәулеталин Бас хатшы болып қайта сайланды.

Қазақстан Республикасы Кәсіподақтар федерациясының басшысы TÜRK-IŞ басшылығына екі елдің кәсіподақтары арасындағы достық қарым-қатынасты дамытудағы күш-жігері үшін, Қазақстан Кәсіподақтар федерациясының Халықаралық кәсіподақтар конфедерациясына мүшелігін қалпына келтіру кезіндегі қолдауы мен өзара түсіністігі үшін ризашылығын білдірді.

«Құрметті ағайындар, осы атаулы күні сіздерге еңбекші халықтың игілігі жолындағы адал еңбектеріңіз үшін, Түркияны қуатты және гүлдену жолындағы шынайы тілегіңіз үшін Қазақстан кәсіподақтарының атынан шын жүректен алғыс айтамын. Біз іскерлік қарым-қатынасымыз бен берік достығымызды жоғары бағалаймыз.Біз өз тәжірибемізбен бөлісуге және сіздерден үйренуге дайынбыз. Қазақстанда еңбек стандарттары мен әлеуметтік қорғауды жақсарту бойынша белсенді жұмыс жүргізіліп жатыр. Біздің елдердегі барлық жұмысшыларға жақсы жағдай жасай отырып, біз бірге көп нәрсеге қол жеткізуге үміттіміз» , - деп атап өтті Сатыбалды Дәулеталин.

Қазақстан мен Түркияның ұлттық кәсіптік орталықтары арасындағы ынтымақтастықты нығайтуға сіңірген еңбегі үшін ҚРКФ Бас кеңесінің шешімімен Түркияның TÜRK-IŞ кәсіподақтар конфедерациясының президенті Эргюн Аталай Қазақстан Республикасы Кәсіподақтар Федерациясының жоғары халықаралық мараппаты «Ынтымақтастық» медалімен құрметтелді, оны бүгін Сатыбалды Дәулеталин түрік әріптесіне табыс етті.

Түркияның TÜRK-IŞ кәсіподақтар конфедерациясының 24-ші кезекті конгресі үш күн өтеді, осы уақыт ішінде делегаттар бірлестіктің Жарғысына өзгерістер енгізуге, іс-қимыл жоспарын қабылдауға және басшыны сайлауға ниетті.

Естеріңізге сала кетейік, Анкарада Түркі мемлекеттерінің кәсіподақтар ұйымының I Конгресі өтті. Жаңа интеграциялық бірлестіктің құрамында Қазақстан, Әзірбайжан, Қырғызстан, Өзбекстан және Түркияның ұлттық кәсіптік орталықтары бар. I Конгресс делегаттары Түркі мемлекеттерінің кәсіптік одақтар ұйымының жарғысын қабылдады, ұйым кеңесін бекітті және басшыларды сайлады. I Конгресс делегаттары Түркі мемлекеттерінің кәсіптік одақтарын ұйымдастырудың негізгі мақсаттарын белгілейтін қорытынды Декларация қабылдады. 

ҚР Кәсіподақтар федерациясының медиаорталығы