Антикор мен ІІМ басшылығы Ақмола облысында сыбайлас жемқорлыққа қарсы іс-қимыл мәселелері бойынша отырысқа қатысты
Көкшетауда Ақмола облысының әкімі Ермек Маржықпаевтың төрағалығымен Сыбайлас жемқорлыққа қарсы іс-қимыл мәселелері жөніндегі комиссияның отырысы өтті, оған Сыбайлас жемқорлыққа қарсы іс-қимыл агенттігі төрағасының бірінші орынбасары Олжас Бектенов және Ішкі істер министрінің орынбасары Алексей Калайчиди қатысты.
Комиссия отырысында жергілікті атқарушы органдардың ҚР 2015 – 2025 жылдарға арналған Сыбайлас жемқорлыққа қарсы стратегиясын іске асыру жөніндегі 2018 – 2020 жылдарға арналған іс-шаралар жоспарын орындау мәселелері қаралды.
Отырыста сөз сөйлеу барысында Олжас Бектенов қатысушыларға сыбайлас жемқорлыққа қарсы заңнамалық новеллаларды түсіндіре отырып, сыбайлас жемқорлыққа қарсы іс-қимыл шараларын қабылдамағаны үшін басшылардың жауапкершілігін күшейтуге, сыбайлас жемқорлыққа қарсы қызметке әкімшілік сыбайлас жемқорлық құқық бұзушылықтардың жолын кесу бойынша өкілеттіктер беруге, сондай-ақ мемлекеттік мекемелердің сыбайлас жемқорлық тәуекелдеріне ішкі талдауды сапалы және уақтылы жүргізуіне назар аударды.
Ішкі істер министрлігі басшысының орынбасары осы жылдың наурыз айында Министрлік жанынан «Işkı ıster ministrlıgı – Adaldyq alańy» жобалық кеңсесі ашылғанын атап өтті, оның миссиясы тұрмыстық сыбайлас жемқорлық деңгейін қысқарту және азаматтардың ішкі істер органдарына сенімін арттыру болып табылады.
Облыс әкімі өз сөзінде өңірде сыбайлас жемқорлықтың алдын алу және қоғамда парасаттылық идеологиясын қалыптастыру бойынша ауқымды жұмыстар жүргізіліп жатқанын, бұл ретте белсенді қоғам өкілдері мен көрнекті қайраткерлер тартылып жатқанын атап өтті. Халық арасында жүргізілген сауалнамалардың оң нәтижелері іске асырылып жатқан шаралардың тиімділігін көрсетеді.
Соңында Олжас Бектенов мемлекеттік органдардың өңір қоғам өкілдерімен бірлесіп жүргізіп жатқан жұмысына оң баға бере отырып, сыбайлас жемқорлыққа қарсы алдын алу шараларын күшейту қажеттігін атап өтті.
[xfvalue_img]
7 пікір