Жамбыл облысында екі адам жалған банктің чектерін көрсетіп, тауарларды сатып алып отырған
Азық-түлік дүкенінің иесі полицияға арызбен жүгінді. Әйел бір ай бойы екі жігіттің тауар сатып алып, жалған төлем чектерін ұсынып тұрғаны туралы хабарлады. Құқық бұзушылар смартфондағы қосымшаны пайдаланып, алушының аты-жөні мен төлем сомасын енгізіп, дүкен шотына ақша аударылғаны туралы чектерді қолдан жасаған. Осыдан кейін жігіттер сатушыға жалған түбіртекті көрсеткен. Келтірілген залалдың жалпы көлемі 110 мың теңгені құрады.
Осы дерекке қатысты ҚР Қылмыстық кодексінің 190-бабы 2-бөлігі бойынша сотқа дейінгі тергеу амалдары басталды.
Полиция қызметкерлері жедел-іздестіру іс-шараларын жүргізу кезінде облыстың 19 және 20 жастағы екі тұрғынын анықтады. Ұсталғандар өз кінәларын толықтай мойындады. Қазіргі уақытта келу туралы міндеттемемен босатылды.
Жамбыл облысының Полиция департаменті кәсіпкерлерді қырағы болуға және тауар үшін қолма-қол ақшасыз төлемді тек банк терминалдары арқылы қабылдауға шақырады.
[xfvalue_img]
