Төтенше жағдай кезеңінде Тараз мемлекеттік педагогикалық университетінде емтихан тапсыру процесі қалай жүзеге асады

Жамбыл облысы Өңірлік коммуникациялар қызметінің ақпарат алаңында Тараз мемлекеттік педагогикалық университетінің ректоры, э.ғ.д., профессор Ержан Әмірбекұлы төтенше жағдай кезеңінде студенттердің емтихан тапсыру процесі қалай жүзеге асатындығын атап өтті. 

Бакалавриат бойынша 1,2,3 курс студенттері және магистратураның 1 курс студенттері үшін емтиханға дейінгі аралық бақылау кезеңі қашықтан оқу технологиясы бойынша емтихан тапсыру сессиясы ретінде ұйымдастырылады. Оның негізгі платформасы – Platonus жүйесіне енгізіледі. Сондай-ақ, басқа да бағдарламалық жүйелерді қолдана отырып, емтиханды ұйымдастыру қамтамасыз етіледі.

Шалғай ауылдарда тұратын студенттердің жағдайына сәйкес емтиханды белгіленген уақытта тапсыра алмай қалғандар үшін студенттің ыңғайына қарай кешкі 20:00-ге дейін тапсыру мүмкіндігі қарастырылған.

Емтихан тапсыру формасы тест және жазбаша түрде жүзеге асады. Студент жұмысы плагиат арқылы тексеріледі. Ал денсаулық жағдайына немесе желінің мүлде тартпай қалу жағдайы сынды қиындықтарға тап болған студенттер үшін емтихан уақытын ұзарту мүмкіндігі қарастырылған. Ол қажет болған жағдайда маусым айының немесе тамыз айының соңына дейін, ерекше жағдайларда қырқүйек айының бастапқы күндеріне дейінгі уақытты қамтиды.

ТарМПУ баспасөз қызметі